Funsionário publiku nain walu (8) husi instituisaun publiku oin-oin simu medalia rekoñesimentu, sertifikadu no osan $3.000.00, hanesan premiu apresiasaun ida ba sira tanba hatudu prestasaun servisu ne’ebe exelente.
Graciado Aquino Sousa Ferreira, agradese ba governu tanba rekonese no valoriza ona servisu ne’ebe nia hala’o nudar professor iha munisipio Lautem, postu adminsitrativu Lospalos, suku Lore.
Hanesan professor siensia iha ensino baziku Lore, nia uza foer sira iha lixu hanesan dos, botir aat, sedotan no seluk tan hodi halo roo oan atu hatudu ba labarik sira hodi komprende diak liu tan kona ba siensia.
Nia hateten, ida ne’e mak alternative ida ba professor sira ne’ebe hanorin iha area remotas uza hodi introdus siensia ba labarik sira, tanba eskola seidauk iha laboratorium siensia ne’ebe adekuadu.
“Teoria deit sira haluhan lalais, maibe liu husi pratika sira bele hanoin hetan nafatin buat ne’ebe sira aprende,” nia hateten.
Nia dehan, premiu ne’e sai motivasaun ida ba nia atu halo servisu diak liu tan liu –liu hanoin kreativu sira ne’ebe iha hodi tulun labarik oan sira.
Nia enkoraja, professores siensia sira atu labele hein laboratorium maibe tenke iha inovasaun kreativu hodi hanorin labarik sira no halo sira sai interese diak liu tan aprende siensia.
Aquino hahu nia kareera professional iha tinan 2008 hanesan professor voluntario no iha tinan 2011 sai hanesan funsionario publiku tanba iha prestasaun ne’ebe diak.
Entretantu, Luisa Manuel de Fatima Ribeiro sente orgulho tanba durante tinan naruk hala’o knar hanesan parteira sai tama fasilidade saude iha area rural hodi ajuda inan sira, no ikus mai hetan duni rekonesementu husi governu liu husi premiu apresiasaun ne’e.
“Ba oin, hau tenke hadia hau nia servisu diak liu tan no osan ne’ebe hau hetan hau sei rai no haree fali hau nia oan nia edukasasaun,” nia hateten.
Nia hateten, ema individu sira ne’ebe kestiona servisu atendimentu parteira sira nian ne’e tanba problema individu, liu –liu la gosta hodi jeneraliza, maibe parteira sempre servisu ho fuan ho laran hodi atende inan partu no inan isin rua sira.
Enkuantu Parteira Luisa, hahu kareera professional iha tinan 1999 iha sentru saude (Puskesmas) Buruma no iha tinan 2001 muda mai iha uma maternidade ospital referral Baucau.
Kandidatus ba atribuisaun destinasaun premius e sertifikadu tinan 2017, iha nain 148 mai husi instituisaun publiku diferrente, maibe ho prosesu avaliasaun ne’ebe iha ikus mai hetan nain 14 mak merese. Nain 14 ne’e nain 8 hetan premiu destinasaun no nain 6 hetan sertifikadu apresiasaun sein osan.
Entretantu, Primeiru Ministru Rui Maria de Araujo kongratula funsionario sira ne’e no husu atu sai nafatin ezemplu ba servidor estado sira seluk atu servisu ho dedikasaun tomak.
“Sira ne’e tenke sai nafatin ezemplu atu ita hotu banati tuir, la’os deit nivel funsaun publiku maibe nivle hotu iha sosiedade nia laran,” nia husu.
Nia mos, husu funsionario publiku sira atu respeitu meritu nudar dalan ida hetan promosaun, labele kaer afiliasaun politika atu hetan promosaun.
