Saude munisipio Ermera kria programa ezaminasaun regular ba labarik tinan lima mai kraik sira hodi kontrolu sira nia status nutrisaun nian.
Iha peskiza Ministerio Saude (MS) tinan 2013 kona ba hahan no nutrisaun, hatudu katak 65% labarik tinan lima mai kraik iha munisipio Ermera sofre malnturisaun raes badak (stunting), enkuantu 48% todan menus no krekas iha 11% .
Diretor Saude munisipio Ermera, doutor Herculano Seixas dos Santos hateten esforsus ne’ebe sira halo mak hasa’e atividade promosaun edukasaun saude liu –liu nutrisaun, fo suplementu aihan ba labarik sira ne’ebe
identifika malnutrisaun no halo ezaminasaun regular.
Nia dehan, benefisiu husi ezaminasaun liu –liu tetu todan no sukat lila regular ne’e atu detekta sedu hodi halo tratamentu no evita komplikasaun hirak ne’ebe kauza ba defisiensia.
Iha fulan nen nia laran (Janeiru to’o Junho) “ami konsege tetu labarik 18 mil, husi numeru ne’e iha 47% mak ho malnutrisaun grave,” nia hateten, iha salaun Ministerio Saude, Dili.
Maibe, nia optimista katak peskiza sira tuir mai taxa malnutrisaun iha munisipio Ermera sei tuun tanba sira iha servisu outreach ne’ebe forte tebes, halo servisu ezaminasaun no distribuisaun aimoruk vitamina ba labarik sira.
Problema malnutrisaun, nia hateten ne’e servisu integradu e la’os MS nia responsabilidade deit, tanba fator ba malnturisaun ne’e barak, hahu husi konesementu familia, insufsiente aihan, falta bee moos no seluk.
Entretantu Diretor Saude munisipio Baucau, Leonel Guterres hateten nutrisaun ne’e problema ne’ebe seriu, presiza ema hotu nia kontribuisaun.
Nia informa, kada tinan sira identifika labarik 1% mak sofre malnturisaun grave husi populasaun labarik iha munisipio Baucau.
“Kazu ida-rua ita halo referral mai iha ospital atu halo tratamentu intensive,” nia hateten.
Nia hatutan, esforsu ne’ebe sira halo atu redus malnutrisaun mak halo ezaminasaun regular mos ba labarik sira no fo eduaksaun ba inan-aman sira kona ba nutrisaun liu husi programa outreach sira hanesan Servisu Integradu
Saude Komunidade (SISCa), saude familia no klinika movel sira.
