Organizasaun feto sira servisu hamutuk ho Ospital Nasional Guido Valadares hala’o atividade doasaun ran hodi ajuda pasientes, liu –liu inan no labarik sira ne’ebe presiza ran.
Diretora Forum Komunikasaun Feto Timor –Lorosa’e (FOKUPERS), Marilia Alves hateten atividade solidaridade ida ne’e hala’o hodi selebra loron moris organizasaun nian ba dala 20.
Enkuantu tema ba selebrasaun tinan ida ne’e mak “feto ho saude”, nia hateten tanba FOKUPERS harii iha tinan 20 liu ba bainhira ativista feto lubun ida ho apoiu husi mane balun organiza workshop ida koalia kona ba direitu
feto no saude reprodutivu.
“Ami haree, katak importante tebes ita hatuur ita nia solidaridade ba ita nia maluk sira ne’ebe presiza tebes,” nia hateten iha Timor Plaza, Dili.
Alende ne’e, nia dehan iha mos atividade ezersisio hamutuk hanesan Zumba no Yoga inklui mos seminar nasional ida kona ba saude reprodutiva.
Partisipa iha atividade solidaridade ne’e alende mai husi organizasoens feto, mos husi instituisaun Forsa Defeza Timor-Leste (F-FDTL), PNTL no estudante sira.
FOKUPES mak organizasaun local ne’ebe harii iha tinan 1997, ho objetivu atu promove feto nia direitu no fo asistensia ba feto sira ne’ebe hetan violasaun seksual husi militar Indonezia.
Entretantu espoza Prezidente da Republika, Cidalia Guterres rekonese katak atividade dosaun ran ne’e importante tebes atu ajuda ema ne’ebe presiza.
“Iha tinan kotuk liu ba, bainhira partu hau nia ran menus e presiza ran, tanba ne’e ita presiza ajuda liu husi ran turuk ida, bele salva ema nia vida,” nia hateten.
“Timor oan tenke hadomi malu, maske la konese malu maibe kuandu ita nia ran hanesan iha situasaun difisil, bele salva ita nia vida.”
Tanba ne’e, nia enkoraja organizasaun FOKUPERS atu kontinua fo apoiu ba feto no labarik sira ne’ebe vulneravel hodi atinji igualidade jeneru no justisa ne’ebe justu ba feto sira iha rai laran.
Alende ne’e, nia mos husu atu organizasaun feto sira kontinua hala’o atividade prevensaun violensia bazeia ba jeneru, fo asistensia legal ba feto sira, halo advokasia ba direitu feto asesu ba justisa.
Iha parte seluk Xefe Unidade Banku Nasional de Sangue (BNS), Gilberto Madeira hato’o agradesementu ba organizasaun feto sira ne’ebe ho laran luak mobilize ema atu halo doasaun ran, tanba stok ran ne’ebe iha tipu balun
sei menus.
“Agora dadaun ami iha stok ran A mak menus liu, tanba iha fulan ida ne’e kuaze maioria pasiente ne’ebe presiza ran tipu A+,” nia hateten.
Nia informa, dala ruma BNS stok ran laiha maibe esforsu ne’ebe sira halo mak halo kontaktu ho doador voluntario sira atu responde ba iha kazu emergensia, hanesan inan ne’ebe sofre ran fakar no ran menus.
Nia dehan, sira pronto atu fo asistensia doasaun ran bainhira organizasaun no instituisaun ruma hakarak kontribui ran hodi ajuda pasiente sira ne’ebe presiza.
