Komunidade ne’ebe hela besik iha merkadu Tais Colmera sente preokupadu ho okupante merkadu tais ne’ebe mama malus no tafui malus been arbiru, e situsaun ida ne’e ladun furak ba vizitor sira (liu-liu malae) atu haree.
Tuir Anastacia Gire Sobemo, katak lolos sira ne’ebe hela iha merkadu tais ne’e, liu-liu sira ne’ebe foin mai husi foho, tenke iha konsiensia hodi labele tafui malus been arbiru.
“Keta tafui malus been arbiru, tanba bele afeta ba ita ema nia saude no tais market ne’e ema estrangeiro barak mak mai sosa tais iha ne’eba, entaun fatin ne’e tenke moos hanesan imagen ida iha ita nia rai,” nia sujere, iha
Colmera, Dili.
Tanba ne’e, nia husu ba governu liu husi administrasaun munisipiu Dili atu taka avizu ruma iha fatin ne’eba, nune’e sira ne’ebe hela hodi fa’an tais iha fatin ne’e atu labele soe foer inklui tafui malus been arbiru iha ne’eba.
“Fahe informasaun ruma ba sira ne’ebe hela iha fatin ne’eba kada semana, atu nune’e komunidade bele halo tuir,” nia sujere.
Alende ne’e, nia mos husu ba komunidades atu soe foer iha fatin lixu ne’ebe governu estabelese ona, tenke iha konsiensia rasik hodi kria ambiente ne’ebe moos no saudavel.
Iha parte seluk Xefe Aldeia 02 Manufuik, suku Colmera, Manuel Amaral hateten sira nia parte hasai ona karta ida hodi aviza komunidade Colmera atu labele soe foer arbiru, maibe kontinua la halo tuir.
“Sira hanoin katak foer ne’e buat bai-bain ida,” nia hateten.
Maske nune’e, nia nafatin husu ba komunidade sira atu soe lixu iha fatin ne’ebe iha, karik laiha fatin lixu, bele tau iha karon (mamuk) laran, hodi kontribui ba servisu saneamentu nian ho diak, ambiente ne’ebe moos no
saudavel.
Enkuantu Xefe Saneamentu munisipiu Dili, Domingos dos Santos Suriano hateten iha fatores tolu (han soe, hemu soe no fuma soe) mak sai kauza prinsipal ba foer sira iha sidade Dili.
Nia dehan, sekarik ema hotu iha konsiensia ba fatores tolu ne’e, maka sidade Dili sei moos no saudavel liu tan.
“Ami observa, dala barak estudante sira mak barak liu soe foer arbiru, sira la’o han no hemu hotu soe arbiru deit, lahatene tau foer iha fatin ne’ebe governu prepara tiha ona,” nia hateten.
Entaun, nia husu ba komunidade no estudante sira tenke iha konsiensia hodi kria ambiente ne’ebe moos no saudavel, tau lixu iha nia fatin.
