Organizasaun feto inklui Movimentu Feto Foinsa’e, Caucus no Patria, hala’o edukasuan sivika ba membrus konselhu do sukus, hodi hasa’e sira nia konesementu kona ba importansia feto involve iha vida politika.
Objetivu husi edukasuan sivika ba iha konselhu do suku, tuir Diretora Caucus, Paula Corte Real katak hodi sira bele ba halo influensia ba feto maluk sira iha sira ida-idak nia sukus hodi partisipa ativu iha vida politika, liu-liu iha
elisaun parlamentar tinan ne’e.
“Materia ne’ebe ami fo mak kona ba sistema elisaun, apuramentu husi munisipiu mai nasional, depois oinsa bele halo keixa ba iha CNE karik mosu desintendementu ruma, hatene partido ida hetan kadeira ida,” nia hateten,
iha Timor Plaza, Dili.
Iha elisaun prezidensial fulan Julhu liu ba ne’e, nia hateten iha votantes 200 mil resin maka la partisipa iha eleisaun inklui feto, entaun liu husi edukasuan sivika ida ne’e oinsa bele hasa’e numero feto iha elisaun parlamentar 22
Julhu agora ne’e.
Nia hateten, komunidade sira presiza partisipa no hatene, liu-liu partisipasaun feto tanba mos hola parte iha prosesu dezenvolvementu nian.
“Ami nia planu ne’e, ami hakarak halo edukasuan sivika iha distrito hanesan Baucau, Manatuto, Ermera, Liquisa maibe labele realiza tanba la biban ona. Dia 22 Julhu ita elisuan ona,” nia dehan.
Iha fatin hanesan Diretor Jeral Sekretariadu Tekniku Administrasuan Eleitoral (STAE), Acilino Manuel Branco hateten edukasuan sivika husi organizasuan feto ne’e hanesan meius ida hodi mekaniza elisuan parlamentar tinan
ne’e.
“Elisaun bele la’o ho susesu depende ba kontaktu administrasaun ne’e rasik, organizasaun eleitoral ho nia kompetensia atu regula liu husi lei eleitoral,” nia hateten.
Alende ne’e, nia dehan elisuan bele la’o ho susesu presiza ema hotu nia kontribuisaun, feto-mane, lideransa sira, politikus, fiskais, orbservadores, grupos vulneravel, ema ho defisientes, ida-idak oinsa mak bele sosializa
aan hala’o prosesu ida ne’e.
Iha parte seluk Xefe Suku Kampung Alor, Alcina Carvalho dos Santos hateten feto nia votus determina futuru nasaun doben Timor-Leste, tanba feto nia partisipasaun iha vida politika hahu kedas iha tempu rezistensia to’o ohin
loron ukun aan.
“Haree ba pasadu, feto fo nia kontribuisaun maka’as to’o ohin loron ita hetan ukun aan,” nia dehan.
Tanba ne’e, nia enkoraja maluk feto sira atu book aan dadaun ona, ho konsiesia no servisu maka’as hodi alkansa objetivus ne’ebe mak iha, hakarak ou la hakarak feto tenke kolabora ho mane sira hodi lori nasuan doben ne’e
ba futuru ne’ebe diak liu.
