Komando Polisia Nasional Timor –Leste (PNTL) halo rehabilitasaun ba postu Unidade Polisia Fronteiras (UPF) iha munisipiu Bobonaro, Cova Lima inklui Regiaun Espesial Oe-Cusse) tanba kondisaun postu iha fatin tolu ne’e la favorese ona atu uza.
Segundu Komandante Jeral PNTL, Komisariu Faustino da Costa hateten husi komando aloka ona orsamentu balun hodi rehabilita postu tolu ne’e iha tinan ne’e (2016).
“Ami identifika postu tolu ne’e mak kondisaun ladiak no presiza hetan rehabilitasaun,” Komisariu Costa hateten, iha nia fatin Kuartel Jeral PNTL, Kaikoli, Dili.
Komando loke ona konkursu ba kompanha sira kona ba projetu ne’e, maibe nia dehan to’o oras ne’e seidauk iha kompanha ida mak mai kompete.
Nia deskonfia, kompanha sira la hatama dokumentus hodi kompete ba obra ne’e tanba montante orsamentu ne’ebe alokadu ki’ik liu no postu hirak ne’e iha area ne’ebe remotas liu.
“Orsamentu iha deit $5 mil no iha area remotas, konserteza kompanha sira ne’ebe aluga ekipamentus no makina bo’ot sira lakohi, tanba presiza gastus bo’ot,” nia hateten.
Tanba ne’e, nia dehan komando sei uza alternative seluk hodi buka kompanha ne’ebe besik iha area ne’eba atu halo deit manutensaun, duke osan sira ne’e fila fali ba kofre estadu.
Kona ba postu UPF iha fatin seluk, nia hateten iha kondisaun diak hotu, maibe bee moos mak araska tanba maioria postu sira ne’e halo iha foho leten.
“Sira iha liu foho lolon, bee labele sa’e to’o iha ne’eba, ita muda postu mos labele, tanba fatin ne’e tenke iha ne’eba duni,” nia hateten.
Iha fatin seluk Membru Parlamentu (MP) Nasional, Ana Ribeiro konkorda katak postu tolu ne’e presiza hadia duni tanba kondisaun ladun diak ona.
“Ami ba halo fiskalizasaun ami haree postu sira ne’e presiza hetan atensaun,”nia hateten.
