Ema nain tolu to’o lima husi ema nain 40 ne’ebe fo ran kada loron konfirmadu positivu moras hepatitis B tuir dadus husi Banku Nasional de Sangue (BNS).
Xefe Unidade BNS, Arsenio Jose hateten servisu transfusaun ran ne’e servisu ne’ebe importante no presiza pasensia hodi asegura ran ne’ebe pasiente sira simu ne’e seguru husi moras infeksaun sira.
Nia hateten, pakote ran ne’ebe konfirmadu ho hepatitis B, HIV no sipilis sira destroy tiha, enkuantu ba pakote ran ne’ebe seguru (livre husi moras) distribui ba iha fasilidade saude sira hodi fo atendimentu ba pasientes ne’ebe presiza.
“Ami fo sai rezultado ba sira no haruka sira ba iha sentru VCCT hodi hetan konseling no enkoraja nafatin sira atu halo tratamentu,” nia hateten iha servisu fatin Bidau Dili.
Iha fulan Setembru 2016, nia dehan ekipa BNS konsege koleta pakote ran 299 husi voluntario no familia sira, no husi numeru ne’e iha nain 17 mak konfirmadu pozitivu hepatitis B, nain ida hepatitis C, 12 sipilis no nain ida HIV agora iha hela tratamentu.
Alende ne’e, nia mos husu ema hotu ho voluntariumente atu halo doasaun ran regular hodi ajuda pasientes ne’ebe presiza, liu –liu inan feto sira, tanba volume nesesidade aumenta kada loron, enkuantu ema ne’ebe fo ran oituan liu.
“Kada loron simu sampel 50-60, maibe ami nia kapasidade so bele nain nain 5 to’o 10, tanba ita haree ita nia stok la sufsiente atu fo atendimentu,” nia hateten.
Nia dehan, esforsu ne’ebe BNS halo mak koleta ran husi familia pasiente no voluntario sira hodi garantia stok maske realidade nafatin la sufsiente.
Nia dehan, BNS mos hetan apoiu ekipamentus husi Organizasaun Saude Mundial (OMS) hanesan kama doasaun hamutuk 10, makina tetu ran 15 no makina analiza ran ida.
Kona ba ekipamentus, nia dehan sei distribui balun ba iha ospital referral (lima) no restu sei uza iha nasional hodi halo servisu doasaun ran nian.
Nia hateten, kriteria ba fo ran mak ema nia todan tenke 45 kilograma, deskansa diak no tensaun 120 pur 80, tanba todan sai determinasaun ba todan ran ne’ebe sei hasai.
Iha parte seluk komunidade Carnizo Soares, hateten kampanha sosializasaun importante tebes atu sensibiliza komunidades liu –liu foinsa’e sira kona ba lalaok moras ida ne’e.
“Komunidades tantu iha nasional no rural menus informasaun kona ba moras ida ne’e, tanba ita nia governu seidauk halo kampania nasional ida ba moras ne’e,” nia hateten.
Kona ba stok ran, nia husu BNS atu labele hein deit iha edifisio maibe tenke halo mos aprosimasaun ba iha instituisaun sira hanesan eskolas, universitario no seluk tan hodi kolekta ran.
Antes ne’e espesialista moras infeksaun, dotora Danina Coelho hateten seidauk bele halo tratamentu ba moras hepatitis B, tanba governu seidauk hatama aimoruk.
“Governu seidauk hatama aimoruk entecavir no tenofovir hodi halo tratamentu ba moras Hepatitis B,” nia dehan.
