Mane (arguido) ida baku nia nia fen (vitima) to’o desmaia, tanba deit arguido deskonfia vitima ba hasoru malu ho mane seluk.
Iha audiensia julgamentu, vitima deklara katak iha data 24/11/2015 vitima ba hasoru malu ho nia alin feto iha Timor Plaza, maibe arguido deskonfia katak vitima ba hasoru mane, tanba antes ne’e vitima hetan telefone husi mane ida ne’ebe nudar nia primu.
No wainhira vitima fila husi Timor Plaza, iha tempu ne’eba arguido toba hela, entaun vitima tein ba kalan nian.
Wainhira arguido hader lahatene nusa, arguido nervozu no mur-mura ba vitima hodi husu vitima “o ba ne’ebe mak kleur los ne’e, o ba hasoru o nia doben karik?”.
Maibe, iha altura ne’eba vitima hatan arguido ho lian mamar, maibe tanba hirus arguido trata vitima ho liafuan mal edukadu.
“Nia tolok hau, depois nia sai ba liur foti fatuk iha uma oin ne’e nia tuda hau e hau nia oin halai kedas no hau desmaia tiha,” vitima deklara iha audiensia julgamentu iha Tribunal Munisipal Dili.
Nia rekonese, mos katak depois de vitima desmaia, arguido lori kedas ba ospital e agruido mos haree sira nia oan nain tolu iha uma durante vitima iha ospital.
Nia hateten, vitima ho arguido agora diak malu tiha ona no hela iha uma deit hodi haree sira nia oan.
Hafoin rona tiha deklarasaun ne’e, juis prezidente husu ba arguido atu hili koalia ou nonok, maibe arguido hili koalia hodi dehan ba tribunal, katak deklarasaun ne’ebe mak vitima hato’o ne’e los hotu.
“Hau arepende saida mak hau halo ona no iha future hau la halo tan,” nia promete.
Iha fatin hanesan Ministeriu Publiku akuza arguido ho artigu 145 kodigu penal kona ba ofensas integridade fizika simples ho natureza violensia domestika, hodi husu ba tribunal atu fo sansaun ne’ebe mak efetivu hodi eduka arguido iha future labele halo tan.
Entretantu hafoin rona tiha deklarasaun hirak ne’e, juis prezidente deside fo pena suspensaun tinan ida ba arguido.
