Hafoin tinan barak nia laran halo konstrusaun, oras ne’e dadaun Ospital Referal Baucau hahu funsiona hikas maske fasilidades seidauk kompletu.
Membru Parlamentu, Francisco da Costa hateten edifisio ne’e remata ona maibe edifisiu laran sei mamuk.
“Registu pasiente iha edifisio foun, maibe halo tratamentu no simu aimoruk iha ospital tuan,” MP da Costa hateten, iha Parlamentu Nasional.
Tuir nia, mekanismu atendimentu ida ne’e ladun diak, tanba pasiente tenke la’o do’ok tan (distansia entre ospital foun no tuan) hodi hetan tratamentu.
Maske seidauk 100% pronto maibe pesoal saude sira utilize ona tanba espasu ne’ebe durante ne’e uza fo tratamentu klo’ot liu.
Konstrusaun ospital referral ne’e hahu iha tinan 2007 maibe paradu tiha no iha 2010 governu kontratu fali kompania internasional Ensul hodi kontinua obra ne’e.
Enkuantu iha Setembru tinan 2016 kompania entrega oficialmente edifisio ne’e ba iha governu liu husi Ministerio Saude no Ministerio Obras Publiku.
Total orsamentu ba iha konstrusaun edifisio foun ne’e hamutuk $8 miloens resin.
Hatan ba kestaun ne’e, Ministra Saude, Maria do Ceu Sarmento Pina da Costa katak pesoal saude sira uza edifisio foun ne’e abulatorio hodi halo konsulta deit, baixa seidauk.
“Ekipamentus agora iha hela prosesu kompania sira atu hatama, bainhira instala kompletu ona, ami sei halo inagurasaun,” nia hateten.
Maske la temi kompania ne’ebe manan tender hodi hatama ekipamentus no halo instalasaun ba ospital ne’e, maibe nia dehan iha ekipamentus balun ne’ebe instala dadaun ona.
Hanesan ospital foun, nia dehan sei presiza investe barak liu tan iha ekipamentus mediku nian.
