Alumni Parlamentu Foinsa’e Timor –Leste (APFTL) husu ba governu atu kria lei hodi regula uzu internet iha rai laran, tanba ema barak mak uza internet hodi insulta no tolok malu.
Prezidente APFTL, Zaulino da Silva hateten nudar nasaun foun governu tenke hanoin ona atu prevene aktu violensia sira ne’ebe mai husi media social, tanba ida ne’e risku bo’ot ba estabilidade nasaun nian no ba foinsa’e sira nia futuru bainhira utiliza la tuir dalan.
“Internet la’os problema, problema mak ita ne’ebe uza tanba ita uza meus ida ne’e la ho positive,” nia hateten iha nia knar fatin Becora, Dili.
Nia dehan, internet hanesan biblioteka ida ba sosiedade liu-liu foinsa’e sira atu kapasita aan liu husi informasaun hirak ne’ebe iha.
Nia dehan, APFTL kontinua halo sosializasaun ba komunidades liu –liu foinsa’e sira atu uza internet ho responsabilidade no ba buat positive nian.
Nia informa, tinan kotuk (2015) sira halo ona kampanha uzu internet iha munisipio lima (Ermera, Liquisa, Mantutuo, Aileu, Ainaro no Dili) atu fo hanoin ba foinsa’e sira kona ba etika uzus internet ne’ebe diak.
Koalia kona ba dezenvolvimentu teknologia, nia dehan timor iha progresu ne’ebe signifikante tebes, tanba maioria populasaun Timor –Leste iha telemovel no bele asesu ba iha rede internet.
APFTL mak hanesan asosiasaun joventude ne’ebe ho nia papel halo sosializasaun edukasaun, transformasaun ba mentalidade no promove direitu foinsa’e nian.
Enkuantu Diretora organizasaun Movimentu Feto Foinsa’e (MOFFE), Yasinta Lujina konkorda no presiza duni baze legal ida hodi regula uzus internet iha rai laran tanba durante ne’e ema uza hodi halo defamasaun ba ema seluk.
Nia dehan, teknologia ne’e fasilidade ne’ebe lolos sosiedade ida-idak aproveita hodi halo mudansa ba sira nia moris, maibe dala barak uza la tuir funsaun lolos.
“Hau haree foinsa’e sira nunka utilize atu buka informasaun ne’ebe reforsa sira nia estudu, maibe sira uza hodi tau sira nia atividade lor-loron,” nia hateten.
Tanba ne’e, nia husu ba orgaun kompotente sira atu konsidera situasaun ida ne’e, tanba violensia bele mosu liu husi linguazen ne’ebe mosu iha media social sira.
Antes ne’e Membru Parlamentu sira ejiji ba governu atu kontrolu media social no taka situs pornografia iha Timor-Leste hanesan nasaun seluk (Indonesia), maibe governu seidauk bele regula.
