Primeiru Ministru, Rui Maria de Araujo rekomenda ba ministrus no sekretario estado sira atu integra asuntu jeneru iha planu asaun annual no orsamentu 2017 nian, garantia fo benefisio hanesan entre feto no mane ba programas governu nian.
Sekretaria Estado Apoia Sosio Ekonomia Feto (SEM), Veneranda Lemos rekonese orsamentu jeral do estado ne’ebe parlamentu aprova kada tinan iha pursentu ki’ik ba programa feto, maibe seidauk masimu.
Nia dehan, SEM esforsu hela halo advokasia ba linha minsiterio sira atu integra asuntu jeneru iha planu asan annual minsiterio no sekretario estado hotu nian iha orsamentu tinan oin (2017).
“Ho konesementu primeiru ministru nian ami (SEM) manda ona karta ba minsiterio no sekretario estado sira hotu para bele aloka orsamentu ba sensivel jeneru,” SE Lemos hateten, hafoin partisipa iha wokshop kona ba integrasaun kompromisio sira kona ba igualidade jeneru no planeamentu iha orsamentu do estado iha Hotel Timor, Dili.
Iha ministerio balun hanesan Ministerio Interior, Ministerio Agrikultura e Peskas no Ministerio Adminsitrasaun Estatal tau ona orsamentu sensivel ba jeneru (fo benefisia ba feto no mane), maibe barak mak seidauk. “Presiza fo hanoin nafatin.”
Atu garantia Minsiterio no Sekretario estado sira integra duni asuntu jeneru ba sira nia programa orsamentu 2017, SEM hola ona parte iha komisaun revizaun orsamentu hodi analiza orsamentu husi minsiterio no sekretario sira hotu.
Iha parte seluk, Prezidente Grupo Feto Parlamentar (GFPTL), Deputada Florentina da.C.Pereira M. Smith, konkorda katak presiza duni iha orsamentu ne’ebe sensivel ba jeneru, tanba feto persentajen bo’ot liu iha Timor-Leste.
Nia mos rekonese, katak orsamentu ne’ebe Parlamentu Nasional aprova kada tinan ba linha ministerio sira ladun fo benefisio ba feto sira.
“Fo hanoin ba linha ministerio sira atu inklui orsamentu sensivel jeneru iha sira nia planu asaun no orsamentu ne’ebe hato’o mai parlamentu kada tinan liu –liu orsamentu tinan oin,” nia hateten.
Alende ne’e, nia mos husu ba governu atu fo formasaun ba feto sira, nune’e bele jere apoiu ne’ebe governu fo, tanba realidade grupo feto sira ne’ebe hetan apoiu, laiha rezultadu.
