Unidade Polisia ba ema Vulneravel (VPU) munisipio Lautem sei falta transporte bainhira atu fo asistensia ba vitima violensia bazeia ba jeneru sei desaraska.
Xefe Unidade Polisia Vulneravel, Gil Pereira hateten transporte sai obstaklu bo’ot ba sira atu fo asistensia ba vitima sira liu –liu tula vitima sira ba tuir prosesu julgamentu iha tribunal no ba nesesidades seluk.
Nia dehan, VPU iha responsabilidade bo’ot tebes atu proteje vitima sira liu –liu feto no labarik ne’ebe vulneravel tebes iha sosiedade.
“Ami hetan obstaklu hanesan menus transporte no kombustivel, ne’e maka afeta ba ami nia servisu,” Pereira informa, bainhira partisipa iha wokshop revizaun planu asaun nasional violensia bazeia ba jeneru, iha salaun Tower, Dili.
“Ami husu ajuda ba ami nia parseirus ALFeLa atu tulun liu –liu tula vitima sira ba tuir julgamentu no ba hasoru prokurador sira.”
Alende ne’e, nia dehan iha mos problema seluk mak nomeasaun no transferensia ba membrus, ida ne’e afeta ba servisu asistensia ba vitima tanba membru foun ne’ebe iha tenke tuir fali formasaun espesifiku fo asistensia ba vitima nian.
Dadus unidade VPU Lautem hatudu hahu husi fulan Janeiro to’o June, registu ona kazu violensia bazeia ba jeneru hamutuk 10 resin, maioria violensia domestika.
Nia hatutan kada unidade VPU iha kareta ida –ida maibe kareta sira ne’e servisu investigasaun mos uza hodi halo servisu.
Nia hatutan, liu atu servisu VPU la’o efetivu liu tan tenke iha transporte ne’ebe kolokadu no motorista permanente ida atu bele halo servisu diak liu tan liu –liu fo asistensia ba vitimas.
Entretantu membru Grupo Feto Parlamentar (GFP), Deputada Josefa Alvares Pereira Soares, hateten diskusaun orsamentu jeral do estado tinan 2012, GFP propoin orsamentu hodi sosa kareta ba polisia VPU sira no osan ne’e passa iha parlamentu nasional maibe problema ne’e la rezolve.
“Atu haree kona ba transporte ba VPU sira, ami aloka (trezentus sincoenta mil) sosa kareta ajuda polisia sira iha munisipios ne’ebe transporete laiha maibe osan ida ne’e aplika fali ba buat seluk,” nia lamenta.
Eis Prezidete Grupo Feto Parlamentar ne’e, konsidera desizaun ida ne’e viola regras orsamental nian tanba iha planu orsamentu atu sosa kareta ba polisia VPU sira maibe realidade halo fali buat seluk no sosa kareta mos la’os ba VPU.
Nia preokupa, bainhira tula vitima sira iha kareta privado ou parseirus nia kareta tanba bele mosu violensia seluk ne’ebe la espera husi arguido ne’ebe fo ameasa ba vitima nia seguransa.
Nia hatutan, GFP presiza halo estudu ida klean liu tan hodi haree problema ida ne’e, iha estudu ne’e identifika iha duni nesesidade atu sosa kareta ba VPU sira, merese atu hamosu proposta iha diskusaun orsamentu tinan oin.
