Agora dadaun iha ona grupos benefisiariu 34 husi munisipiu Bobonaro, Ermera, Ainaro, Aileu inklui Dili ba programa Avansa Agrikultura hafoin implementa durante fulan walu nia laran.
Chief of Party USAID Contractor, Nicholas Richards hateten programa ida ne’e sei fo liu importansia ba involvementu feto liu –liu hasa’e konesementu sira nian kona ba negosio.
“Ami agora dadaun servisu hamutuk ho grupos 34 iha munisipio lima e iha grupos neen maka asina ona MoU ho loja bo’ot sira iha Timor,” Richards informa, bainhira partisipa iha forum klubu matabixu jornalistas, iha edifisio USAID Hudi laran, Dili.
Nia hateten, grupos ne’e hetan ona formasaun baziku kona ba oinsa mak halo negosiu no fasilita ona kooperasaun servisu entre supermerkadu ho grupos produtores hodi garante sustentabilidade.
Nia hatutan, sira sei hasa’e partisipasaun feto rural sira nian iha setor agrikutlura no negosio, nune’e sira bele halo transaksaun negosio ne’ebe diak liu tan hodi hadia sira nia moris.
Alende ne’e, nia hateten sira sei halo mos perfil badak kona ba feto sira nia partisipasaun ba programa sira no impaktu ba ekonomia familias.
USAID Avansa Agriculture project, nia dehan sei servisu hamutuk ho grupo 250 iha munisipio lima ne’e durante tinan lima nia laran.
Iha parte seluk Membru Komisaun D (ekonomia e dezenvolvementu), Deputada Brigida Correia, hateten feto barak mak involve iha setor agrikultura liu –liu holtikultura, maibe sira nia produsaun la sustentavel tanba depende ba udan been deit.
“Sustentabilidade katak koileta tiha produtu ida tenke iha hanoin kuda fali buat seluk, ida ne’e seidauk,” nia kestiona.
Tanba ne’e ho apoia agensia internasional USAID ne’e, nia dehan importante tebes atu motiva jovens hodi loke sira nia hanoin, involve maka’as liu tan iha setor ida ne’e.
Nia rekonese, problema infra-struturas sai obstaklu bo’ot ba grupo produtor sira liu –liu bainhira atu lori sira nia produtus ba iha merkadu.
