Membru Parlamentu, Deputadu Manuel Castro, lamentavel ho rehabilitasaun estrada iha postu administrativu Venilale munisipiu Baucau abandonadu, tanba governu laiha kontrolu masimu.
Nia hateten, iha tinan kotuk (2015) Kompania Estrada Bo’ot mak kaer projetu rehabilitasaun ba estrada iha Venilale ne’e, maibe kontinuasaun laiha.
“Kompania ne’e ba kee hela kuak iha estrada sira ne’e kuaze sinku kilomentrus depois abandona tiha,” Deputadu Castro kestiona, iha Parlamentu Nasional.
Tanba ne’e, nia hateten iha fulan Maiu 2016, Komisaun E (infra-estruturas, transportes e komunikasoens) kontaktu ba Dirasaun Obras Publiku munisipiu Baucau nian, maibe fo razaun ne’ebe la klaru.
“Tekniku sira iha ne’eba dehan fali lolos atu tau aspal, maibe aspal sira ne’e lori fali ba Dili, ne’e hanusa mak ne’e,” nia preokupa.
Nudar projetu nain, nia dehan, governu iha direiru absolutamente atu halo kontrolu ba obra ne’ebe sirkula hela iha teritoriu tomak.
“Ne’e governu nia responsabilidade, sira mak tenke haree ida ne’e,” nia hateten.
Iha parte seluk Deputada Albina Marcal, hateten problema abandonadu projetus sai ona isu klasiku ne’ebe membru parlamentu sira sempre kestiona bebeik, maibe nunka rezolvidu.
“Nunka iha mudansa e governu nunka tau konsiderasaun,” nia hateten.
Iha parte seluk Ministru Obras Publiku, Transportes e Komunikasoens), Gasto Sousa, hateten iha tinan 2016 ne’e governu esforsu hodi responde ba preokupasaun hirak ne’e maibe la garantia atu hadia hotu-hotu dala ida.
“Ita iha hela esforsu nia laran oinsa mak bele resolve kestaun sira ne’e, neneik-neneik sei rezolve hotu,” nia hateten.
