Embaixada Nova Zelandia apoia $500 mil ba Instituisaun Polisia Nasional Timor-Leste, hodi estabalese Postu Ofisial Polisia Sukus (OPS) iha kada suku iha rai laran.
Segundu Komandante PNTL Komisariu Faustino da Costa, hateten ho osan husi embaixada Nova Zelandia ne’e sei harii postu OPS iha tinan ida ne’e (2016).
“Ami sei harii postu OPS nian iha tinan ne’e,” Komisariu Costa hateten.
Kona ba atu harii uluk iha suku hira no iha munisipiu ne’ebe, nia dehan, sei iha faze diskusaun ho komandante munisipiu sira.
“Ami seidauk diskuti klean, karik ita sei monta uluk iha fatin ne’ebe risku konflito,” nia hateten.
Iha parte seluk Membru Komisaun B (seguransa, defeza, negosiu estrangeirus) Deputada Anna Ribeiro, apoia inisitiva ida ne’e hodi harii postu OPS nian iha sukus, nune’e sira bele servisu ho profesional liu tan.
“Durante ne’e sira laiha fatin proprio, entaun sira lametin iha fatin ida, entaun sira nia atendementu mos ladun masimu,” nia hateten.
Enkuantu iha tinan ida ne’e (2016) Parlamentu Nasional la aprova osan espesifiku atu harii postu OPS iha sukus, maibe nia espera ho osan ida ne’e bele ajuda ona estabelesementu postu ba OPS sira.
