Grupo Feto Parlamentar Timor –Leste (GFPTL) konsidera partidus politiku (Parpol) balun laiha seriedade atu promove feto iha vida politiku.
Tanba tuir Prezidente GMPTL, Deputada Florentina Smith, katak partidus politiku balun konsidera vida politika ne’e mane nian.
“Partidus politikus iha pilar importante ba ezersisio demokrasia hodi fornese espasu ba feto sira kontribui ba dezenvolvementu liu husi sira nia partisipasaun iha eleisaun,”nia hateten, iha workshop haforsa no partisipasaun feto iha eleisaun, iha Tower Fatuhada, Dili.
Atu aborda preokupasaun feto nian iha prioridade governasaun, nia dehan, importante tebes ba partidus politiku sira atu promove feto nia partisipasaun hodi kontribui ba prosesu dezenvolvementu nasional.
Tanba ne’e, nia husu ba partidus politikus sira atu fo mos formasaun politiku ba feto potensial iha partidu laran no promove sira iha lista kandidatura.
“Investe iha feto mak investe iha familia, komunidade, sosiedade no nasaun, tanba ne’e partidus politiku, sosiedade sivil no entidades hotu iha responsabilidade bo’ot atu fo kapasitasaun ba feto sira,” nia hateten.
Hanesan feto ne’ebe involve aan ona iha vida politika, nia parte enkoraja nafatin feto sira atu kapasita no fiar aan hodi kompete ho mane sira, tanba lafasil atu kompete ho mane sira iha kargu bo’ot sira.
Nia informa, involvementu feto iha vida politika iha nivel nasional, Timor-Leste iha presentajen bo’ot tebes kompara ho nasaun seluk iha ASEAN, maibe presiza haforsa liu tan tanba iha nivel local sei minimu tebes.
Entretantu Sekretario Jeral Partidu Demokratiku (PD), Mariano Asanami Sabino, katak PD iha komitmentu bo’ot tebes promove feto sira iha kargu foti desizaun sira.
Nia hateten, dadaun ne’e PD iha kadeira walu iha parlamentu ne’ebe kompostu husi feto hat no mane hat, nune’e mos iha governu maske realidade PD la hetan oportunidade.
“Ami nia mehi mak ne’e, to’o tempu ida kargu prezidente no primeiru ministru ne’e feto mak tuur hotu, nune’e bele halo dezisaun diak ba oan sira, tanba ami mane sira sempre foti desizaun tanba nekat,” nia hateten.
Tuir nia, lolos partidus politiku sira hotu tenke iha eskola politika ba kuadrus no militantes atu eleva sira nia kapasidade, maibe ida ne’e laiha.
Iha sorin seluk Vise Sekretario Jeral Partidu Fretilin, Josefa Alvares Pereira Soares, hateten Fretilin mosu iha 1974 ne’ebe hahu kedas luta ba emansipasaun feto, tanba ne’e mak mosu Organizasaun Popular Mulher Timor (OPMT).
“Fretilin moris 1974 e politika igualidade hatuur nanis ona iha manual politika, tanba involvmentu feto importante tebes liu husi OPMT,” nia hateten.
Atu garantia involvementu feto iha vida politika, nia dehan, asuntu jeneru tenke sai politika nasional estado nian no sai agenda prioridade ba partidus politiku sira hotu.
