Governu Indonezia prontu atu selu nia eis funsiunario publiku (PNS) 3.000 ne’ebe sira nia dokumentus kompletu maibe seidauk simu sira nia direitu durante ne’e, tanba naran la tama iha lista pagamentu.
Diretor Jeral (DJ) Sekretario Estado Politika Formasaun Profesional e Empregu (SEPFOPE), Jacinto Barros Gusmão, hateten sira halo ona ekontru dala rua ho governu Indonezia hodi diskute kona ba eis PNS Indonezia inklui military no polisia ne’ebe naran laiha iha lista pagamentu iha segundu etapa iha 2015.
“Governu Indonezia prontu atu selu sira ne’ebe naran iha no dadus kompletu, sira ne’ebe laiha sei la iha duni,”nia hateten.
Iha pagamentu segundu etapa, nia dehan, ekipa SEPFOPE identifika ema nain 3.000 mak naran laiha lista maske sira iha dokumentus kompletu.
“Ami haruka ona lista ba iha Ministerio Negosio Estrangeirus Indonezia nian hodi submete ba orgaun kompetente halo verifikasaun,” nia hatutan.
Nia hatutan, governu Indonezia fo fali deit eis funsionario (funsionario publiku inklui military no polisia) sira nia osan ne’ebe uluk governu koa ba asuransi kesehatan, perumahan no pensiun nian, ne’e sira nia direitu.
Nia dehan, ba eis funsionarios ne’ebe uluk simu ona osan asuransi kesehantan hodi halo tratamentu inklui sira ne’ebe lakohi koa sira nia osan harii uma nian iha momentu ne’eba, sira nia naran la tama iha lista.
Iha fulan Junu 2016, nia dehan, ekipa SEPFOPE sei dezloka ba Indonezia hasoru malu ho governu Indonezia hodi diskute no buka solusaun ba asuntu ida ne’e.
Iha parte seluk, Prezidente Komisaun D (ekonomia e dezenvolvimentu), Deputada Jacinta Abucau Pereira, husu governu Timor –Leste liu husi SEPFOPE tenke halo diskusaun ida klean ho governu Indonesia kona ba asuntu ida ne’e.
“Tanba ne’e sira nia direitu,” nia dehan.
