Tribunal Munisipal Dili (TMD) kontinua julga kazu ofensas ba integridade fizika simpels ho forma violensia domestika ne’ebe involve arguido AC (la’en) baku vitima CC (fen), tanba vitima ba toba iha uma seluk.
Tuir akuzasaun Ministeriu Publiku nebe lee sai husi juis prezidente, katak iha dia 18/02/2015 dadersan, vitima prepara hela matabixu iha dapur, arguidu tama ba hodi dehan “labarik tarde ona, diak liu lalika ba eskola ona”, hafoin rona ida ne’e vitima tama ba haris fatin atu haris, e arguido hein vitima iha kuartu laran, e wainhira vitima sai husi haris fatin no tama ba kuartu, arguido soe hotu vitima nia faru ba rai.
Iha altura ne’eba sein koalia buat ruma, vitima foti fali faru hirak ne’e hatama ba armari, no foti faru balun hatama iha pasta laran ho intensaun wainhira fila husi servisu, vitima atu ba toba iha nia bin nia uma.
Wainhira sai ba liur atu ba ona, vitima dehan hela ba arguido katak “orsida fila servisu hau ba toba iha bin sira”, rona tiha liafun ne’e, arguido foti vitima nia pasta hodi riba ba rai, dada vitima ho sira nia oan hodi sa’e motor.
Iha altura ne’eba hafoin fila servisu, vitima la fila ba uma maibe ba fali nia bin sira, no tuku 8:00 kalan iha loron hanesan, arguido tuir kedas vitima iha nia bin nia uma, hodi baku vitima iha ne’eba, rasta nia fuuk, tebe no rasta nia hodi sa’e motor.
Wainhira to’o iha uma, arguido kontinua baku tan vitima, basa no tuku dala tolu iha vitima nia kotuk laran to’o vitima monu ba rai.
Hafoin lee sai akuzasaun hirak ne’e, juis prezidente husu ba arguido hili koalia ou nonok, maibe arguido hili koalia, hodi dehan ba tribunal, katak akuzasaun hirak ne’e balun los no balun sala.
Antes ne’e, nia deklara, katak sira iha ona problema no vitima la koalia ho arguido durante loron tolu, tanba ne’e arguido nervozu hodi soe vitima nia ropa.
“Durante loron tolu ne’e nia sempre provoka hela deit hau, ropa ne’e hau soe tuun ba rai atu haree nia reasaun deit, e laiha intensaun atu duni nia,” Arguido hateten.
Arguido rekonese, katak arguido baku, tebe no basa duni vitima, e nia halo ida ne’e tanba nervozu, vitima ulun to’os demais.
“Nia la koalia tiha depois atu ba toba fali nia bin nia uma, husik hau no oan mesak deit, ne’e mak halo hau nervozu,” Arguido hateten.
Hafoin rona tiha deklarasaun husi arguido, juis prezidente husu ba Ministeiru Publiku atu halo alegasaun, ne’ebe prova katak tribunal tenke fo pena ne’ebe justu ba arguido, tanba arguido viola ona lei kodigu penal artigu 145 no lei violensia domestika artigu 35 alinea B husi lei kontra violensia domestika lei numeru 07/2010 de julhu.
Hafoin ida ne’e juis prezident deside fo pena suspensaun tinan rua ba arguido, hodi husu ba arguido la bele repete tan aktu hanesan tanba akontese tan arguido sei tama direitamente ba prisaun.
