Delegadu Ospital Referal Suai (ORS), Alipio Gusmao Lopes, informa katak moras infesaun respiratoriu (ISPA) no diarea regista aas iha Ospital Referal Suai, maioria afeta ba labarik.
Moras rua ne’e barak liu afeita ba labarik, tanba nia dehan, iha inan barak mak to’o agora seidauk iha konesementu kona ba halo asaun prevensaun ba moras rua ne’e.
“Lolos inan sira tenke fo hanoin ba oan sira, kuandu la’o iha rai rahun laran tenke taka inus, ibun ou sosa maskra ba oan sira atu uza hodi labele kona moras ispa, buat sira ne’e la halo tanba laiha kunhesementu,” Lopes hateten.
Nia dehan, kona ba moras diarea iha inan balun mos seidauk iha konesementu kona ba oinsa prepara hahan ne’ebe saudavel no seguru.
“Sira fase modo talves dala rua deit, hahan sira kaundu tau iha meja dala ruma sira la taka, no lalar mai hobur depois oan sira han fali, depois sira nia oan han mos la fase liman,” Lopes hateten.
Nia hateten, husi parte Ministeriu Saude sei kontinua haforsa sosializaun ba asuntu ne’e hodi fo hanoin ba inan feto sira, oinsa bele halo asaun prevensaun ba moras rua ne’e labele kontinua aas kada tinan.
Iha parte seluk Deputada Albina Marcal, rekonese moras rua ne’e domina iha ospital referal sira iha teritoriu, tanba inan sira laiha konesementu ba asaun prevensaun inklui mos rai rahun barak kauza husi projetu sira ne’ebe la’o dadaun.
“Tenke hasa’e konesementu inan sira kona ba asaun prevensaun hodi sira transforma fali ba sira nia oan,” nia sujere.
Nia hatutan, hahan seguru no saudavel presiza mos akompanha ho infra-estruturas baziku ne’ebe tenke favoravel, presiza iha bee moos, eletrisidade no asesu ba estrada ne’ebe diak.
“Hahan ne’ebe moos, maibe bee laiha atu halo nusa,” nia hateten.
Iha parte seluk komunidade Maria Magdalena, hateten programa sosializasaun ne’e importante atu fo alerta ba inan sira hodi bele haree oan sira nia saude.
“Atu inan sira bele proteze oan sira husi moras ne’e,” nia dehan.
