Organizasaun Rede Feto (RF) Timor –Leste servisu hamutuk ho Sekretariadu Estado Politika Formasaun Profesional e Empregu (SEPFOPE) fo formasaun ba foinsa’e sira kona ba igualdade jeneru.
Capacity Building Officer Rede Feto, Filomenta Fuca, hateten formasaun ne’e ho objetivu atu hasa’e konesementu foinsa’e sira nian kona ba kontestu igualdade jeneru ne’e rasik, atu labele iha diskriminasaun iha prosesu aprendizajen.
“Hasa’e sira nia konesementu no abilidade ba asuntu igualdade jeneru, atu sira bele respeita malu no apoia malu durante iha formasaun laran,” Fuca hateten, iha nia knar fatin Kaikoli, Dili.
Nia dehan, importante tebes ba ema hotu atu kompriende kontestu igualdade jeneru, nune’e bele kombate diskriminasaun iha familia no sosiedade nia laran.
Nia hateten, formasaun ida ne’e hala’o iha sentru formasaun vocational Dili Institute of Technology (DIT) Baucau, Salele (Suai), Dom Bosco Comoro, Tibar no SENAI Becora.
Nia hateten, programa kapasitasaun ida ne’e hetan apoia finanseira husi agensia international Banku Dezenvolvementu Asia (ADB).
Entretantu Diretor Jeral (DJ) Sekretariadu Estado Politika Formasaun Profesional e Empregu (SEPFOPE), Jacinto Barros Gusmão, hateten formasaun ne’e importante tebes atu sira bele aplika iha sira nia moris lor-loron.
“Ami nia hakarak formadu sira ne’e iha konesementu ne’ebe diak ba kontestu igualdade jeneru, atu sira labele iha diskriminasaun iha servsiu fatin,” DJ Gusmão hateten.
Bainhira formadu sira ne’e iha konesementu diak ba kontestu igualdade jeneru, mak nia dehan, sira sei respeita malu no apoia malu iha servisus saida deit.
Entretantu ativista direitu feto, Isabella Galhos, hateten sosiedade Timor presiza duni informasaun atu kompriende kontestu igualidade ho lolos, tanba dala barak koalia kona ba igualidade jeneru ema dehan ne’e asuntu feto nian.
“Igualdade jeneru ita la’os koalia feto deit, maibe ita koalia ema iha Timor,” nia hateten.
