Hafoin ekipa Provedoria dos Direitus Humanus (PDHJ) halo sosializasaun kona ba asuntu direitus humanus ba membru polisia munisipiu Liquisa, iha tinan 2015 deskobre katak sira livre husi violasaun direitus humanus.
Provedor dos Direitus Humanus e Justisa, Silveiro Pinto, hateten komando polisia munisipiu Liquisa durante tinan 2015 nein iha keixa ida husi komunidades hasoru polisia.
“Husi munisipiu Liquisa ami laiha keixa ida husi komunidades hasoru polisia Liquisa, ne’e hatudu katak ita nia membru polisia sira konese ona regras no lei ne’ebe relasiona ho direitus humanus,” Provedor Pinto hateten, iha nia knar fatin, Kaikoli, Dili.
Nia hateten, mesmu iha komando munisipiu balun sei iha keixa hasoru polisias, maibe numeru ladun bo’ot ona kompara ho tinan hirak liu ba.
“Hanesan komando munisipiu Suai ho Ermera durante tinan 2015, ami so simu keixa ida-ida deit hasoru membru polisia sira,” nia hateten.
Tuir observasaun husi PDHJ no rezultadu monitorizasaun hatudu, katak intervensaun seguransa ne’ebe mak polisia sira halo, jeralmente tuir duni ona nesesidade servisus ne’ebe proporsional no responsabilidade.
“Karik sira halo aktu violasaun balun, maibe sira responsabiliza ba saida mak sira halo,” Pinto hateten.
Iha fatin seluk Membru Komisaun B (seguransa, defeza, negosiu estrangeirus), Deputada Anna Ribeiro hateten, situasaun ne’e hatudu katak servisu PDHJ nian iha duni progressu no rezultadu diak, no membru polisia sira mos hahu hatudu profesionalidade liu-liu iha parte violasaun direitus humanus.
“Sira hatene ona katak sira labele komete iha asaun violasaun direitus humanus,” nia hateten.
Nia mos, husu ba komunidade atu iha konsiente hala’o moris tuir regras no lei ne’ebe vigor iha rai laran liu-liu ba joventude sira.
Iha parte seluk komunidade Almeida da Costa, husu ba PDHJ atu kontinua sosializa ba polisia sira no estudantes kona ba saida mak violasaun direitus umanus, tanba iha komunidade barak no estudante balun seidauk iha konesementu klean kona ba ida ne’e.
“Liu –liu sira ne’ebe hela iha area rural sira, ne’e PDHJ tenke kobre hotu,” nia hateten.
