Ministru Obras Publiku, Transportes e Komunikasaun (MOPTK), Gastao de Sousa, hateten iha tinan 2016 ne’e governu aloka orsamentu $4 mileons resin ba manutensaun estradas no pontes iha rai laran.
Nia hateten, governu konsege identifika ona estradas no pontes lubuk ida ne’ebe mak sei halo manutensaun iha tinan ida ne’e.
“Estradas no pontes hirak ne’e ami sei halo manuntensaun iha tinan ida ne’e,” Ministru Sousa hateten, iha Dili.
Mesmu iha tinan ida ne’e la remata halo manutensaun ba estradas no pontes tanba barak demais, maibe nia hateten, governu sei tau tan osan iha tinan oin (2017) hodi finaliza.
Tanba tuir nia, iha tinan 2015 osan ba manutensaun estradas no pontes laiha, nune’e iha estrada barak la halo manutensaun iha tinan 2015.
Iha parte seluk Membru Komisaun E (infra-estruturas, transportes, komunikasaun), Deputadu Manuel Castro, hateten orsamentu $4 miloens ne’e la to’o ba halo manutensaun estradas no pontes, tenke hili ida ne’ebe prior idade.
“Osan $4 miloens ne’e la to’o, governu tenke alista estrada nasional sira ne’ebe atu halo manutensaun,” nia sujere.
Nia mos, sujere ba governu ba future tenke tau iha kontratu ba kualker kompania ne’ebe mak halo estradas no pontes, tenke iha garantia de manutensaun.
“Ezemplu sira halo estrada ida no determina katak sei dura to’o tinan 20, entaun kada tinan tolu tenke halo manutensaun, ne’e kompania nia dever,” nia hateten.
