Diretora Fundasaun Caucus (feto iha politika), Paula Corte Real, hateten Caucus iha komitmentu nafatin hodi kontinua prepara feto potensial sira ba kargu foti desizaun nian.
Nia dehan, kapasitasaun ba feto nunka iha rohan tanba ida ne’e importante tebes, loron –loron sempre iha buat foun atu aprende hodi asegura reprezentasaun feto iha kargu foti desizaun nian ne’ebe ho kualidade.
“Ami lakohi feto ida ba tuur iha pozisaun hanesan infeita ou responde ba kuota deit, maibe tenke sai duni lideransa ida ne’ebe maximu, intermus desizaun, analisa no intervensaun ne’ebe kualidade no responde duni ba komunidade nia nesesidades,” Diretora Caucus Corte Real, iha nia fatin, Kaikoli, Dili.
Nudar nasaun foun, nia hateten, partisipasaun feto iha vida politika diak tebes, maibe pozisaun foti desizaun feto sei minimu, tanba kultura patriarcal sei forte iha sosiedade, entaun sosiedade konsidera feto nia kapasidade sei minimu.
Nia hatutan, lideransa feto balun iha nivel local hatudu ona sira nia kapasidade de lideransa nian, maibe presiza kapasita tan hodi haforsa liu tan katak feto mos bele.
Nia hatutan, kapasitasaun ne’ebe durante ne’e sira fo ba feto potensial sira mak kona ba jestaun lideransa, planu orsamental no prioridades, relatorio, monitorizasaun, advokasia, koalia iha publiku no mobilizasaun komunidades (koordenasaun).
Entretantu Prezidente Asosiasaun Feto Asaun Dezenvolvementu Aileu (FADA), Cristina da Conçeicão, hateten feto munisipio Aileu preparadu atu partisipa iha eleisaun jeral hirak ne’ebe sei mak, liu –liu eleisaun asembelia munisipal, xefe do suku no eleisaun jeral tinan 2017.
“Ami hola parte ona iha diskusaun planu estrategiku ba iha prosesu pre-deskonsentrasaun no ami mos hetan oportunidade tama iha seksaun preparasaun sira hotu,” nia hateten.
Nia dehan, asosiasaun esforsu hela nafatin kapasita no prepara feto potensial sira, nune’e bainhira hetan pozisaun sira importante bele hatudu duni lideransa ne’ebe kualidade no responde duni nesesidade komunidades nian.
