Diretora Fundasaun Caucus (feto iha politika), Paula Corte Real, husu ba estruturas asosiasaun feto municipal sira atu hamutuk hodi enkoraja no prepara feto potensial sira iha munisipios partisipa iha prosesu dezenvolvimentu iha rai laran.
Nia dehan, iha asosiasaun balun mak hahu halo ona programa hanesan trasa planu estrategiku, sosializasaun plataforma asaun feto nian no promove profil asosiasaun nian ba komunidade sira, maibe iha ida rua mak seidauk lao diak tanba problema internal.
“Ba estrutura eleitu sira labele lori problema no interese privadu kahur malu, tenke hamutuk hodi responde ba nesesidades ne’ebe feto sira presiza no resolve problemas ne’ebe feto sira hasoru,” Diretora Corte Real sujere, iha nia fatin Kaikoli, Dili.
Nia hatutan, feto sira ne’ebe eleitu tenke servisu maka’as hodi hadia feto nia moris no dezenvolve sira nia munisip
Membru Rede feto Timor –Leste ne’e mos louva ho komitmentu Sekretario Estado Apoiu Sosio Ekonomia Mulher (SEM) nian hodi kontinua politika ida ne’e no Parlamentu Nasional ne’ebe aloka osan kada tinan hodi fasilita asosiasaun sira nia programa ba feto iha munisipio.
Entretantu Prezidente Asosiasaun Feto Ermera, Maria Exposto, rekonese obstaklu bo’ot ne’ebe asosiasaun hasoru mak partisipasaun ema sira ne’ebe tuur iha estruturas (eleitu) iha programa minimu tebes.
Maske iha obstaklu barak, maibe, nia dehan, sira konsege halo ona atividades balun hodi prepara feto sira iha prosesu dezenvolvementu sira ne’ebe governu planea ona.
“Ami halo ona desiminasaun informasaun ba komunidades, liu –liu feto sira kona ba prosesu pre-deskonsentrasaun, desentralizasaun no eleisaun sukus inklui mos municipal, atu sira mos iha konesementu ba prosesu,”Exposto hateten via telefone.
Nia dehan, iha tinan 2015 sira hetan fundus husi governu (SEM) $5000 hodi funsiona eskritorio asosiasaun nian.
Entretantu Prezidente Asosiasaun Feto Asaun Dezenvolvimentu Aileu (FADA), Cristina da Concoseiçao, hateten sira hetan ona formasaun lubuk ida inklui halo peskiza kona ba partisipasaun feto iha vida politika husi organizasaun feto sira ne’ebe iha.
“Ami involve iha diskusaun planu asaun ba prosesu pre-deskonsentrasaun, ami mos halo sosializasaun ba regulamentu interna hanesan tara bandu ba komunidades,” nia hateten.
Nia hatutan, sira sei kontinua servisu hamutuk ho organizasaun feto sira hodi fo kapasitasaun ba feto potensial sira iha munisipio Aileu.
