Inspektor Jeral do Trabalho Sekretario Estado Politika Formasaun Profesional e Empregu (SEPFOPE), Aniceto Leto Soro, hateten durante tinan 2015, iha emprezas hamutuk 279 mak viola lei do trabalho.
Tipu violasaun hirak ne’ebe mak empreza sira viola mak, nia dehan, kontratu trabalho iha 130 kazus, laiha vistu trabalho iha 116 kazus, saude, seguransa, protesaun iha servisu fatin iha 63 kazus inklui kazu salariu minimu.
“Tinan 2015 iha emprezas 279 mak identifika viola lei do trabalho husi 1091 emprezas ne’ebe mak eziste iha Timor –Leste,” Inspektor Soro hateten, iha nia fatin, Kaikoli, Dili.
Nia hatutan, maioria trabalhador local mak hetan violasaun, tanba kampu servisu limitadu, entaun sira labele keixa maske hetan violasaun (tanba kostume bolu malu deit).
Nia informa, iha tinan 2015, sira konsege rekolha osan multa husi kompania sira hamutuk $109,290 no tama ona iha kofre estado, sei iha 1860 mak prosesu hela.
Maske nune’e, nia dehan, kada tinan numeru emprezas ne’ebe viola lei do trabalho iha redusaun, tanba barak mak iha ona konesementu kona ba kontiudu lei do trabalho no inspesaun do trabalho kontinua la’o.
Entretantu Vise Prezidente Komisaun D (Ekonomia e Dezenvolvimentu), Domingos Carvalho de Araujo, hateten emprezas no komunidade barak mak iha ona konesementu ba kontiudu lei ne’e, maibe presiza halo sosializasaun tan, tanba komunidade iha baze laiha konesementu ba leis ne’ebe mak iha.
“Presiza halo sosializasaun nafatin ba komunidade sira, liu –liu trabalhadores iha baze, tanba ami sei simu keixa nafatin kona ba hapara servisu sein justifikasaun,” nia sujere.
Nia husu ba SEPFOPE atu implementa lei ne’e ho diak, tanba iha kompania balun hapara trabalhadores sira sein razaun no osan PHK, ne’e labele tanba sira presiza osan.
“Husu empreza sira atu fo mos osan PHK ba trabalhador sira bainhira sira nia kontratu remata ga taka, nune’e sira bele sustenta sira nia moris to’o hetan fali servisu,” nia sujere.
