Vise Ministru Obras Publiku Transporte e Komunikasaun (MOPTK), Inacio Moreira, hateten atu minimize engarrafamentu iha sidade laran governu deside ona sosa bis kota hodi halo operasaun iha Dili laran.
Nia hateten, total mikrolet ne’ebe halo operasaun iha Dili laran barak ona e mikrolet tula deit pasageirus nain sanulu resin rua deit, enkuantu mini bus bele tula ema nain hat nulu resin dala ida.
“Entaun ita sosa bis para tula pasageirus barak kedas, ne’e efisiente no efetive liu hodi minimize engarrafamentu iha rai laran,” Vise Ministru Moreira hateten, iha Dili.
Maibe antes ne’e, nia dehan, governu halo uluk estudu viabilidade hodi halo ajustamentu inklui negosia ho emprezariu ruma ne’ebe interese atu investe iha area ida ne’e
Iha parte seluk Deputadu Arao Noe, apoia tebes insiativa ne’e, tanba durante ne’e transporte publiku iha rai laran deskontroladu tebes.
“Uluk iha tempu Indonezia ne’e ema bolu bis DAMRI, bis iha sidade laran, agora governu tenke negosia ona kompania ida hodi responsabiliza ba ida ne’e,” Deputadu Noe sujere.
Alende ne’e, nia mos sujere ba governu atu halo kontrolu masimu ba situasaun transporte publiku iha rai laran, tanba durante ne’e idak-idak halo ninian.
Iha parte seluk komunidade Matias Freitas, konkorda ho inisiativa ida ne’e, nune’e transporte publiku bele organizadu liu no rapidu.
“Ita tenke halo mudansa oinsa mak bele organiza transporte publiku sira ho diak, nune’e bele hamenus engarrafamentu iha rai laran,” nia hateten.
