Inspektor Jeral do Trabalho (IJT) Sekretario Estado Politika Formasaun Profesional no Empregu (SEPFOPE), Aniceto Leto Soro, hateten tinan 2015, ema estrangeirus nain 2190 mak hetan vistu servisu hodi hala’o servisu iha Timor –Leste.
Husi ema nain 2190, nia hateten, iha nain 1690 mak servisu hanesan trabalhadores no nain 502 servisu hanesan empregadores iha Timor –Leste.
“Tinan kotuk ita konsege aprova vistu servisu ba ema nain 2190 hodi servisu iha Timor –Leste, maioria husi nasaun Indonesia,” Inspektor Soro hateten, iha Dili.
Nia hatutan, trabalhadores no empregador sira ne’e mai husi nasaun 34, maioria husi Indonesia, Cina, Filipina no seluk tan.
Nia hatutan, servisus ne’ebe sira hala’o iha Timor –Leste mak hanesan manager, mandor, kozineiru, karpinteiru, diretor, badaen no mekaniku, tanba area hirak ne’e Timor sei menus.
Nia informa, rekizitus ne’ebe aplikante sira tenke priense mak hanesan passaporte, estadu mediku, surat keterangan kelakuan baik polisia, diploma no kontratu servisu.
Iha parte seluk, Memberu Parlamentu Nasional, Deputadu Virgilio da Costa Hornai, lamentavel tanba feto estrangeirus lubuk ida mak hala’o atividades prostituisaun iha sidade laran.
“Informasaun ne’ebe hau hetan iha movimentu, feto Indonezia lubuk ida mak halo hela vida prostituisaun iha rai laran, ita labele aseita ida ne’e,” nia preokupa.
Nia mos, husu ba instituisaun relevantes liu –liu Polisia Imigrasaun atu kontrolu maka’as ba ema sira ne’ebe tama mai uza visa turista hala’o fali atividade sira ne’e no ba SEPFOPE atu labele aprova vistu servisu ba ema sira ne’e atu halo atividade illegal sira ne’e iha rai laran.
Hatan ba kestaun ne’e, Inspektor Jeral do Trabalho, Soro hateten sira la fo vistu servisu ba ema atu halo servisu protitusaun, tanba lei bandu.
