Xefe Departamentu Keixas no Reklamasaun Provedoria dos Direitus Humanus no Justisa (PDHJ), Josefa Soares da Silva, hateten iha tinan 2015 sira konsege simu keixa kona ba violasaun direitus humanus ne’ebe mak involve oknum Polisia Nasional Timor –Leste PNTL) no Falintil- Forsa Defeza Timor –Leste (F-FDTL) hamutuk keixas 80.
Nia hateten, iha tinan 2015 ne’e total keixas violsaun direitus humanus ne’ebe involve oknum seguransa sira hahu tuun kompara ho tinan kotuk (2014) hamutuk 114.
“Barak liu joven sira mak mai hato’o keixa, tanba balun hetan tortura husi oknum seguransa sira,” Xefe Silva hateten, iha Dili.
Nia esplika, iha asaun operasaun oknum polisia sira labele baku ema arbiru sein husu klarifikasaun, nune’e mos wainhira kaptura ona ema ruma hodi kumpri sela detensaun, proividu atu baku.
“Kuandu ida ne’e mak akontese, sira bele mai hato’o keixa,” nia hateten.
kona ba keixa ne’ebe tama ona, nia dehan, PDHJ sei halo avaliasaun hodi deside keixa hirak ne’e tama iha kategoria saida, sekuandu kategoria krimi sei enkaminha ba Ministeriu Publiku.
Iha parte seluk Deputadu Agustino Lay, hateten violasaun direitus humanus ne’ebe dalabarak liu involve oknum seguransa no defeza, presiza atu toma atensaun.
“Realidade hatudu, kuandu problema ruma mosu oknum polisia tuun e nunka husu uluk, baku tiha mak husu, ne’e ladun diak,” Deputadu Lay kestiona.
Tanba ne’e, nia husu, ba instituisaun seguransa atu hadia nia membrus (oknum) sira nia attitude hirak ne’e, nune’e ba future labele akontese tan asaun hanesan.
Hatan ba kestaun ne’e Komandante Jeral Polisia Nasional Timor-Leste (PNTL), Julio Hornai, husu ba PDHJ atu dadus kona ba oknum PNTL no F-FDTL ne’ebe komete iha aktu violasaun direitus humanus.
Tanba tuir nia, normalmente oknum seguransa sira tuun ba baze atuhalo operasaun bazea ba keixa ne’ebe mai husi komunidades.
“Ami ba atu defende ema seluk ne’ebe mak sai ona vitima husi ema seluk nia atitude,” Komisariu Hornai hateten.
