Diretor Fundasaun Decolores Del Amor (FDA), Xisto Goncalves, hateten sira nia ekipa sei ba halo sosializasaun kona ba asuntu droga nian ba joventude sira iha Mota-Ain, Batugade, munisipiu Bobonaro.
Nia hateten, sosializasaun ne’e ho intensaun atu informa ba komunidades kona ba impaktu negativu bainhira konsume droga.
“Ita hahu halo ona dialogu iha Batugade no Kupang, no iha dia 22 de Novembro de 2015 sei halo sosializasaun bo’ot iha area Mota-Ain hodi lori hamutuk komunidade husi Batugade hamutuk halo sosializasaun konjunto,” Diretor FDA Goncalves hateten, iha Dili.
Nia dehan, komunidade barak mak seidauk iha konesementu kona ba tipu droga, dala ruma ema lori mai droga, maibe sira la hatene.
“Iha sosializasaun ne’e rasik sei halo teste urine ba komunidade, liu-liu jovens sira,” nia hateten.
Nia afirma, sira kontinua halo aproximasaun ba partes hotu hahu husi estadu, parlamentu nasional, governu no autoridade hot-hotu ne’ebe maka interese ba asuntu ne’e atu nafatin halo dialogu hodi hasa’e konesementu publiku kona ba asuntu ne’e.
“Luta kontra droga ne’e hahu agora, la’os aban bainrua, afinal ita nia joventude potensial lubuk ida mak sai ona vitima no balun lakon sira nia vida,” nia hateten.
Entretantu Diretor Assosiasaun HAK, Manuel Monteiro Fernandes, hateten droga tama mai rai laran ho fasil, tanba seguransa iha fronteiras sei fraku.
“Ita nia maluk polisia nain neen deit mak tau matan ba droga, tantu iha terestres no iha parte tasi nian sei fraku, entaun ne’e hafasil mos ba distributor no produtor droga ninian hatama mai ita nia rain,” Diretor HAK Fernandes hateten.
Nia hateten, Timor-Leste baliza kedas ho nasaun Indonezia liu-liu iha Mota Ain, Mota Tasi, Sakato iha Oe-Cusse.
NIa hatutan, Indonezia iha merkadu bo’ot kona ba droga nian e ida ne’e fasil ba sira atu halo sirkulasaun mai iha rai laran.
“Mai subar tiha iha ita nia rain, depois sira hasai nei-neik ba fali atu fa’an iha Indonezia ou tama fali ba Darwin, Australia,” nia dehan.
