Vise Prezidente Parlamentu Nasional, Deputadu Aderito Hugo, lamentavel ho sidadaun estrangeirus ne’ebe sai fali Funsionariu Publiku (FP) iha instituisaun governu nian.
Tuir lei numeru 8 /2004 Komisaun Funsaun Publiku (KFP) nian, nia hateten, la autoriza sidadaun estrangeirus sai FP iha Timor no kestaun n e’e labele akontese tanba kontra lei ona.
“Ema non-sidadania bele inklui sai funsionariu publiku, ne’e ita bele dehan jestaun ba rekrutamentu ne’e iha situasaun ne’ebe mak lamentavel tebes e grave,” Vise Hugo hateten, iha Parlamentu Nasional.
Nia dehan, iha ema estrangeirus balun mak dadaun ne’e servisu nudar funsiunariu publiku iha ministeiru balun e autoridade reguladores iha KFP durante ne’e la haree ba kestaun ne’e.
“Ne’e knaar komisaun funsaun publiku atu detekta no rezolve kestaun ne’e, tenke hatene oinsa rekizitus atu sai funsionariu publiku, ne’e fator importante,” Hugo hateten.
“Tenke haree asuntu ne’e ho seriu.”
Hatan ba kestaun ne’e Prezidente KFP, Faustino Cardoso, rekonese irregularidade hirak ne’e no iha tempu badak sei halo diagnostika instituisional hodi rezolve problema ne’e.
“Tenke kompriende, ita nia funsaun publika ne’e simu tutan esperiensia sira e balun ne’ebe mai husi UNTAET nia tempu, tanba ne’e presiza hadia no hahu halo diagnostika,” Komisariu Cardoso hateten.
Nia esplika, Timor restaura nia independensia iha 2002, enkuantu UNTAET hahu hala’o sira nia servisu iha kedas tinan 1999 e kuaze tinan hat nia laran funsionariu barak mak rekrutadu iha tempu UNTAET nian, e irregularidade ne’e hahu kedas iha tempu ne’eba.
Iha lei funsaun publiku, nia dehan, ema ne’ebe mak bele sai funsionariu publiku ne’e tenke sidadaun Timorense, konserteza ema ne’e moris iha Timor no inan aman ema Timor, enkuantu iha tempu UNTAET la iha regras hanesan ne’e.
