Diretor Geral Servicos Coorporativos Ministerio Edukasaun, Antonino Pires, hateten sira halo ona distribuisaun karteiras hamutuk rihun lima nulu resin (50.000) ba eskola hotu iha teritorio tomak ne’ebe tama iha lista.
Antes ne’e, nia dehan, sira halo uluk levantamentu ba eskolas hotu iha teritorio tomak ne’ebe falta karteiras, tanba ne’e iha ona lista ne’ebe apropriadu atu halo distribuisaun.
“Iha tinan rua nia laran (2014-2015), ami iha karteiras rihun atus ida e rihun lima nulu resin mak ami fahe ona no sei iha rihun hat nulu resin mak iha hela prosesu,” Diretor Pires hateten, hafoin partisipa iha enkontru ezersisio aprezentasaun relatorio CEDAW, iha salaun Polisia Nasional Timor-Leste, Kaikoli, Dili.
Nia rekonese, katak karteiras hirak ne’ebe uluk iha tinan 2000 (tempu UNTAET) nian ho modelu ai ki’ik ne’e laiha kualidade no kuaze at hotu ona, maibe karteiras foun ne’ebe governu sosa ho modelu masa no ai ho kualidade, tanba halo ho ai ne’ebe iha kualidade no dura ba tempu naruk.
Iha parte seluk membru Komisaun F (saude, edukasaun, kultura, veteranus, igualdade jeneru), Deputadu Leonel Marçal, preokupa ho distribuisaun karteiras ne’ebe governu halo, tama fahe deit ba eskolas ne’ebe iha vila.
“Eskola Bazika Sentral Fatumea to’o agora kadeira laiha inklui mos Eskola Bazika Manus iha sala neen kadeira tolu deit, enkuantu alunus kuaze atus ida resin,” Deputadu Marçal kestiona.
Tanba ne’e, nia sujere ba Ministerio Edukasaun atu fo prioridade ba eskolas ne’ebe iha area remotas, liu –liu eskola ne’ebe estrada ladiak no susar atu asesu iha tempu udan, tanba agora besik tama ona tempu udan.
Reprezenta povu ne’e mos preokupa ho kualidade karteiras ne’ebe governu distribui, tanba karteiras hirak ne’e balun komesa aat fali ona.
