Deputy Program Manager organizasaun Marie Stopes Internasional Timor–Leste (MSITL), Juliao da Silva, hateten ekipa Marie Stopes hala’o sosializasaun sai tama eskola iha Dili laran hodi fahe informasaun ba estudantes (ensino baziku no sekundariu) kona ba importansia saude reprodutivu no seksual.
Nia dehan, informasaun kona ba saude reprodutivu no seksualidade importante tebes ba ema hotu liu–liu joven sira atu bele foti desizaun ne’ebe positivu ba sira nia moris, tanba dala barak mosu problemas isin rua la ho hakarak no numeru abortu la seguru inklui kazu soe bebe aas.
“Ami fahe informasaun iha eskola sira iha Dili laran liu –liu SMP kelas tiga to’o universidade kona ba importansia saude reprodutivu no seksualidade atu sira iha konesementu,” da Silva hateten, iha nia servisu fatin, Vila Verde, Dili.
Nia hatutan, feto foinsa’e barak ho idade menoridade agora isin rua e sira laiha konesementu ne’ebe klean kona ba saude reprodutivu, entaun sira monu ba asidente ida ne’ebe fo impaktu mos ba sira nia future.
“Balun isin rua mai hakarak halo abortus, maibe ami dehan labele e ami halo akonselamentu deit no haruka fila,” nia hateten.
Alende ne’e, nia dehan, MSITL mos oferese linha gratuita ba foinsa’e sira atu kontaktu hodi husu informasaun kona ba saude reprodutivu inklui mos moras hada’et sira liu husi relasaun seksual.
Entretantu Membru Parlamentu Nasional, Deputadu Eladio Faculto, hateten informasaun sira ne’e importante ba sira, maibe presiza haree metodu sosializasaun tanba labarik barak iha koriusidade atu buka hatene no koko.
“Tenke haree positive no negativu atu oinsa ita bele lori labarik sira ba oin ho forma ida diak,” Faculto hateten.
