Korean Internasional Cooperation Agency (KOICA) apoia orsamentu $4.9 miloens ba Ministerio Saude (MS) hodi harii uma maternidade iha postu administrative Hatu-Builico, munisipio Ainaro hodi fo atendimentu ba inan isin rua no bebe sira.
Diretor Nasional Politika Planeamentu e Kooperasaun Ministerio Saude (DNPPK), Ivo Irineu da Conceicão Freitas, hateten akordu ne’ebe hala’o entre ministerio ho KOICA ne’e foka liu ba iha saude maternu no infantil iha area remotas liu.
“Akordu ne’e ba durante tinan tolu nian ho orsamentu alokadu $4.9 miloens ba konstrusaun, fasilidades no instalasaun ekipamentus iha uma maternidade laran,” Diretor Conçeicão hateten, hafoin asina akordu iha Ministerio Saude Kaikoli, Dili.
Nia dehan, apoiu ida ne’e importante tebes tanba loke tan pasu ida ba atendimentu inan isin rua no bebe sira iha area remotas.
“Fo atendimentu ne’ebe diak liu tan ba inan isin rua no labarik sira iha area remotas, tanba ita hatene area sira ne’e dalan ladiak komunidade hela iha foho leten,” hateten nia.
Entretantu Xefe Departamentu Saude Maternal Infantil Ministerio Saude, doutora Triana Oliveira, hateten area Hauteo, postu administrativu Hatu-Builico, munisipio Ainaro ne’e nesesario tebes, tanba komunidade barak hela iha area refere presiza iha uma maternidade atu atende inan no bebe foin moris sira.
“Ami sente kontente ho supporta agensia Koreanu nian mai iha area maternidade seguru no kuidadu bebe foin moris,” nia kontente.
Alende ne’e , nia dehan, KOICA mos fo kapasitasaun ba pesoal saude sira iha munisipio Ainaro no apoiu tekniku balun hodi hasa’e involvementu kominidade ba iha servisu saude maternu infantil.
Nia hatutan, iha uma maternidade la’os deit atu fo atendimentu, maibe servisu hamutuk mos ho grupo supporta inan iha suku no lideransa komunitaria sira halo sosializasaun informasaun ba komunidades kona ba importansia maternidade seguru no kuidadu labarik foin moris.
