Membru Parlamentu Nasional (MP), Deputada Jacinta Abu Cau Pereira, husu ba Ministeriu Agrikultura e Pescas (MAP) atu dezenvolve sistema agrikultura avansadu iha area remotas.
Tanba tuir nia, iha grupus balun hanesan iha suku Seloi, uza sistema agrikultur avansadu no hatudu duni progresu ne’ebe signifikativu.
“Hau hanoin diak ba governu atu dezenvolve iha area urbana ne’e kapas tebes,” Deputada Abu Cau hateten, iha Parlamentu Nasional.
Nia hatutan, sistema agrikultura avansadu ne’e atu hanorin agrikultor sira oinsa mak bele produs modo ne’ebe mak ho kualidade diak.
“Bele uza mos grupu ne’ebe uza ona agrikultura avansadu hodi hanorin fali agrikultor sira seluk,” nia dehan.
Nia dehan, grupu agrikultura ne’ebe uza sistema agrikultura hetan apoiu husi agensia internasional sira, tan ne’e governu presiza mos tau matan, atu nune’e bele iha nia kontinuasaun, wainhira sira hapara sira nia ajudus.
Hatan ba kestaun ne’e, Ministru Agrikultura, Estanislao da Silva, rekonese katak grupu agrikultura balun ne’ebe uza sistema ne’e produs duni modo ho kualidade.
“Sira kuda modo iha Seloi ne’e, ne’e ita bele dehan uma agrikultor ne’ebe mak melhorada , sira kuda tiha nia rezultadu ba fa’an iha supermerkadu kmanek no supermerkadu sira seluk,” Ministru Silva hateten.
Nia informa, agrikultura avansadu hanesan kuda aihan ho sistema teknologia, irigasaun diak, fini mos tenke kualidade, nia produsaun a’as, maibe kustu menus.
“Ita bele uza sistema ne’e, maibe prepara ita nia ema, katak ema sira ne’ebe mak servisu tenke iha konesementu,” nia dehan.
