Organizasaun CARE Internasional loke kompetisaun tein ba funsionario (mane) sira, hanesan meus efetivu ida atu eduka sosiedade katak servisu uma laran (tein) la’os servisu feto nian mesak.
Kompetisaun ida ne’e la loke ba publiku ( ba staf deit), tanba tuir Koordenadora Programa Jeneru CARE Internasional, Yasinta Lujinha, katak atu eduka sosiedade fahe servisu uma laran, tenke hahu husi organizasaun laran.
“Ita hakarak eduka ita nia komunidade, tenke hahu husi organizasaun laran, nune’e bele muda sosiedade nia mentalidade,” Koordenadora Lujinha hateten, iha Bairo-Pite, Dili.
Nia hateten, feto barak la dezenvolve an tanba preokupa ho servisu uma laran no laiha tempu ba sira atu partisipa iha atividades ne’ebe bele hakbi’it sira nia kapasidade.
Nia dehan, atividades ne’e realiza relasiona ho selebrasaun loron mundial feto (8 Marsu), hanesan reflesaun ida ba sosiedade tomak katak igualdade entre fen ho la’en mak reseita diak liu ba moris haksolok familia nian.
Nia esplika, iha grupo tolu mak partisipa iha kompetisaun tein ne’e ; kompostu husi grupo Mane Badinas, Uma Nain no grupo Rai Nain.
Rezultadu ikus husi kompetisaun ida ne’e, nia dehan, grupo Mane Badinas mak sai primeiru lugar, tanba prepara hahan ne’ebe hygiene no iha kompozisaun nutrisaun ne’ebe diak.
Iha parte seluk, Diretor Nasional Politika Dezenvolvementu Jeneru Sekretaria Estado Politika Apoiu Sosio-Ekonomia da Mulher (SEPASEM), Henrique da Silva, apresia ho inisiativa organizasaun nian hodi motiva funsionario mane sira involve iha servisu domestiku.
“Ami haree atividade ne’e diak, hanorin ita (feto no mane) bele servisu hamutuk iha familia laran,” Diretor Silva hateten.
Tanba ne’e, nia sujere atu kompetisaun hanesan bele kontinua iha futuru hodi hatudu ba sosiedade katak mane mos bele halo servisu domestiku, ajuda feto sira, tanba durante ne’e “ema nia hanoin servisu domestiku ne’e servisu feto nian mesak.”
Entretantu partisipantes Gualter V. J. B Sagres, sujere programa hanesan bele kontinua no involve sosiedade tomak atu bele motivu mane sira apoiu feto sira iha servisu domestiku nian.
“La’os deit hatudu iha kompetisaun ne’e, maibe iha uma mos apoiu feto sira hodi prepara aihan ba familia,” nia sujere.
