Porta Voz iha Devizaun Desportu Formasaun no Arte Kultura iha Komite 12 Novembru, Sergio F. Marques Amali, hateten durante tinan 2014 sira nia ekipa konsege halo sosializasaun kona ba espirito nasionalismu ho patriotismu ba estudantes iha eskola tolu (Cannosa, eskola sekundaria 5 de Maiu no Tekniku Vokasional Becora).
Nia dehan, estudantes mak hanesan airiin nasaun nian, tanba ne’e importante ba sira fo konsensiasaun kona ba sentidu nasionalismu ho patriotismu.
“Entaun hahu agora hasa’e joven sira nia konsensiasaun liu husi sosializasaun, oinsa involvementu joven sira iha luta ba libertasaun nasional e aban bainrua sira ne’e mak lidera nasaun ne’e,” Amali hateten, iha Balide, Dili.
Nia kompara, joventude ohin loron ho uluk iha diferensia hahalok, uluk sira hamutuk hodi liberta nasuan ne’e, maibe agora jovens sira buka kria konflitu no la unidu.
“Jovens uluk nia luta mak ohin loron ita hetan ukun an ona, entaun agora oinsa mak liberta fali povu ba moris diak,” nia dehan.
Tuir nia, meus liberta povu ne’e simples deit, oinsa mak kontribuisaun komunidade sira nian ba dezenvolvementu no oinsa mak estudante sira bele iha konsentrasaun ba eskola no liu sosializasaun hanesan para sira komprende.
Nia dehan, lolos programa ne’e hala’o ba eskola hotu iha rai laran, liu-liu eskolas ne’ebe durante ne’e infrenta problemas hela deit, maibe sira iha limitasaun ba orsamentu, entaun foin tama iha eskola tolu ne’e.
Tanba ne’e, nia dehan, komite sei servisu hamutuk ho Sekretariu Estadu Joventude e Desportu (SEJD) inklui mos Ministeriu Edukasaun (ME) atu oinsa mak bele implementa programa ne’e iha eskola sira.
Iha parte seluk Estudante husi eskola 5 de Maio, Januario Pinto, hateten ne’e programa ne’ebe diak, tanba sira koalia kona-ba oinsa jovens bele kontribui ba dezenvolvementu nasaun nian.
Tanba ne’e nia husu atu programa ida ne’e kontinua, liu-liu ba eskola hirak ne’ebe durante ne’e seidauk tama, nune’e estudante sira bele komprende didiak sentidu nasionalismu no patriotismu.
“Luta ba ukun aan atinji ona no agora ita luta oinsa ba povu nia moris diak,” nia dehan.
Alende ne’e Prezidente Komisaun F (saude, edukasaun, kultura, desportu, veteranus no igualdade jeneru), Deputadu Virgilio da Costa Hornai, hateten lolos ida ne’e kompetensia Ministeriu Edukasaun nian.
“Hau hanoin ne’e la’os kompetensia komite 12 de Novembro nian, sira hetan deit titulo veteranos martires ho veteranos da libertasaun, la bele okupa hotu ema seluk nian,” Hornai dehan.
