Sekretaria Estado ba Promosaun Igualidade (SEPI), Idelta Maria Rodrigues,hateten ema ladun sosa tais Timor nian, tanba folin karuun loos.
Tanba ne’e, nia husu, ba grupo feto sira atu haree fila fali presu ne’ebe sira tau ba sira nia tais, tanba kompradores barak mak lamenta ho presu ne’ebe iha.
“Hau rasik dala barak husu ema hotu atu uja tais iha selebrasaun loron importante sira, maibe sira sempre dehan diak liu ami sosa roupa OB no loja baratu liu, duke hola tais karuun no kustu ba suku mos karuun,”SE Rodrigues hateten, iha abertura abertura ba Feira Natal ne’ebe rganiza husi Fundasaun Alola iha, Dili.
Maibe nia mos rekonese,katak seidauk iha presu standard ba iha produtu local sira hanesan tais, maibe presiza tetu didiak nune’e bele atrai mos kompradores sira “lae kompradores hili liu obralan no loja duke tais,” nia dehan.
Nia hatutan, presu tais mak kontinua karuun ema ou Timor oan rasik mos sei la sosa tan tais, tanba komunidade Timor –Leste maioria seidauk iha kapasidade ekonomia ne’ebe diak atu sosa sasan sira ne’ebe ho folin karuun.
Iha parte seluk, Sekretario Estado Industria e Koperativa, Filipus Nino Pereira, hateten Ministerio Komersio Industria Koperativa e Ambiente (MKIA) servisu hamutuk ho treinador balun husi Indonesia fo ona trinamentu ba jestor grupo feto sira kona ba analiza kustu ba produsaun atu sai sasukat ba presu produsaun nian.
“Atu labele tau presu ne’ebe dobru husi kustu produsaun,” SE Pereira hateten.
Entretantu, Koordenador Grupo Inan Terus Hadomi Feto, Adelina Freitas, hateten presu ne’ebe sira tau ne’e justu, tanba kustu ba iha material mos karuun no produs mos kolen.
“Tais mane no feto ho presu $30 ba leten, selendang $20 mai kraik no asesoris, karteira, pasta sira ne’e ho presu $10 mai kraik, tanba material agora karuun, liu –liu kabas,” nia dehan.
