Membru Parlamentu Nasional preokupa ho manu luhan ne’ebe Ministeriu Agrikultura e Peskas (MAP) halo tiha iha suku Dato Tolu, sub-distritu Fohorem, distritu Suai ne’ebe abandonadu.
Membru Komisaun D Parlamentar (ekonomia e dezenvolvementu), Deputada Josefa Alvares Soares, hateten projetu ne’e halo kedas iha 2013, uja orsamentu kapital dezenvolvementu, maibe projetu ne’e remata, laiha rejultadu.
“Halo tiha manu luhan no kolam ikan, maibe manu ida mos laiha, no hau la hare ikan ida iha ne’eba,” Deputada Soares kestiona, iha Parlamentu Nasional.
Ida ne’e nia dehan, hatudu katak MAP halo projetu ne’e laiha planu ne’ebe diak, no estraga osan estadu nian saugati deit.
Nia dehan, MAP tenke tun ba baze hodi halo kontrolasaun ba implementasaun programa refere, ” hakiak ikan no hakiak manu ne’e lao duni ga lae, fatin ne’e ema uja duni ga lae,” Deputada Soares sujere.
Entretantu Ministru Agrikultura e Pescas, Mariano Asanami Sabino, rekonese kestaun ne’e no abandona tanba peskadores ikan no grupu hakiak manu seidauk aproveita didiak fatin ne’e.
“Sira ejiji mak ita halo fatin sira ne’e, maibe la aproveita didiak,” Ministru Asanami hateten.
Tanba ne’e nia dehan, MAP sei informa kestaun ne’e ba regional hodi jere no toma atensaun.
Asanami mos rekonese, katak durante ne’e sistema kontrolasaun ba implementasaun programa ne’e minimu tebes, tanba rekursu umanu iha parte tekniku sei manus.
Maibe iha tempu badak, nia hateten, sei kria inspektor distritu nune’e sira bele haleu no monitoriza projetu ne’ebe halo ona iha distritu sira.
