Membru Parlamentu Nasional lamenta preokupa maka’as kondisaun komunidade iha suku Lourba, distritu Bobonaro ne’ebe durante ne’e la hetan asesu ba bee moos.
Deputada Albina Marcal, hato’o kestaun bee moos hanesan problema baziku ne’ebe tuir lolos governu tenke toma responsabilidade no sai asuntu prioridade.
Tuir nia, problema bee moos nunka rezolvidu, komunidades iha sidade no iha area rurais sempre falta bee moos, no balun la asesu liu ba bee moos.
“Iha area rurais, iha Dili laran mos ema preokupa ba bee moos,” Deputada Marcal kestiona, iha Parlamentu Nasional.
Tanba ne’e nia husu ba governu tenke esforsu hodi identifika problema kona ba bee moos nian, hafoin halo jestaun, nune’e komunidade hotu-hotu bele asesu ba bee moos.
“Iha fatin balun bee sulin arbiru no iha fatin seluk bee araska,” nia kestiona.
Hatan ba kestaun ne’e Sekretariu Estadu Agua Saneamentu e Urbanizasaun (SEASU), Elias Perreira Moniz, rekonese kestaun ne’e, tanba tuir nia problema bee moos la fasil atu rezolve.
“Hanesan iha Taibesi agora sobu tomak no komesa halo jestaun ba be’e,” SE Moniz hateten, iha Parlamentu Nasional.
Make nune’e, nia hateten, governu nafatin esforsu atu resolve jestaun bee moos nian no problema balun komesa identifika ona no garantidu katak iha tinan 2017 povu hotu asesu ona ba bee moos.
Bee moos ne’ebe distribui ba komunidade sira iha Dili laran ne’e mai husi bee matan Agua Sutarana, agora debitu ba bee matan ne’e komesa menus ona, tanba ne’e komesa hahu halo limitasaun no jestaun ba bee moos.
Kona ba bee moos iha area rurais, nia hateten, governu kontinua esforsu no husu ba komunidade sira atu pasensia hodi hein tanba programa kanalizasaun bee moos sei to’o iha sira.
