SN lori nia kaben EM ba hatan iha tribunal no husu divorsiu (cerai) tanba nia kaben iha tuku 2 madrugada ba husu masin iha visinu nia uma.
SN ne’ebe moris hamutuk ho EM durante tinan lima (5) nia laran hirus bainhira nia visinu konta ba nia katak, nia kaben madrugada deit ba husu ona masin iha nia uma. Hafoin SN rona keisa husi ne’e, SN fila ba uma ho laran-manas no husu ba EM atu klarifika.
Liu husi julgamentu ne’e iha Tribunal Distrital Dili (TDD), SN deklara ba tribunal katak bainhira nia husu ba arguidu atu klarifika kona ba razaun husu masin iha visinu, arguidu EM la responde maibe tuku dala ida iha vitima nia tilun-huun parte karuk, no tuda kona iha nia kelen.
Hafoin ida nee, SN dehan, arguidu tama ba uma laran no kontinua lori sasan iha uma laran hanesan bikan, ho tasu hodi tuda vitima.
Antes ne’e mos, ami problema bebeik ona tanba problema masin, maske masin iha uma iha maibe nia ba husu nafatin iha visinu sira.
Ho hahalok nee Ministeriu Publiku (MP) akuza arguidu komete krime violensia domestika ho forma ofensas ba integridade fisika simples tuir artigu 145 kodigu penal Timor-Leste.
Arguidu konsidera akuzasaun husi Ministeriu Publiku (MP) balun lo’os no balun sala tanba la’os nia mak halo uluk asaun violensia.
EM dehan, SN mak lori uluk ai 57 baku nia maibe la konsege ne’ebe arguidu foti fatuk hodi tuda SN nia kelen parte karuk.
Hafoin rona tiha deklarasaun nee husi parte rua,tribunal submete kedas ba iha alegasaun final, nune’e Ministeriu Publiku (MP) husu ba tribunal atu aplika pena suspensaun ba arguidu.
Entertantu parte Defeza husu atu aplika admoestasaun ba arguidu tanba lezada ho arguidu foin mak primeira vez ba tribunal.
Audensia ba julgamentu nee sei adia fali ba loron 16 Setembro tuku 14:00 lokraik hodi rona desizaun final, Audensia nee prejide husi Juis Singular, Antoninho Gonsalves, MP reprejenta husi Prokurador Nelio Carvalho, no arguidu hetan asistensia legal husi Defensor publiku Laura Valente Lay.
