Rede Edukasaun Timor-Leste Coalition for Education (TLCE) loke sentru formasaun ba joventude sira, liu-liu sira ne’ebe la eskola no drop out, atu sira mos bele aprende buat ruma iha sentru ne’e.
Jestor Programa TLCE, Matias dos Santos, hateten edukasaun ne’e importante tebes ba ema hotu, liu-liu joventude sira.
“Ami loke formasaun ba joventude sira kona ba komputer nian, lian Ingles no lian Portugues,” Jestor TLCE Santos hateten, iha Dili.
Tuir TLCE nia observasaun durante ne’e ba joventude sira iha rai laran, nota katak joventude barak mak ladun asesu ba edukasaun. “Ami mos fo hanoin ona ba inan aman sira katak edukasaun importante tebes ba labarik sira nia future,”.
Iha fatin hanesan Joventude Fidelio Fernandes, hateten hafoin akaba iha eskola sekundariu, nia parte labele kontinua ba universidade, tanba inan aman kbi’it la to’o.
“Hau tuir deit kursu lian Ingles nian iha SOLS tinan rua ona,“ Fernandes hateten.
Entretantu membru Komisaun F (saude ,edukasaun, kultura, veteranus no igualidade jeneru), Deputada Bendita Moniz Magno, hateten rekonese katak joventude barak mak sidauk asesu ba edukasaun liu-liu iha area rural.
Tanba ne’e, nia husu ,ba Sektretariu Estadu Politika Formasaun Profesional no Empregu (SEPFOPE) atu loke mos sentro formasaun iha area rural.
“Tenke fo atensaun ba iha area rurais, e husu mos ba media komunikasaun sira atu halo kobertura iha area remotas, fo informasaun kona ba joven sira ne’ebe mak la hetan servisu no la hetan formasaun ruma,” nia sujere.
