Durante fulan walu (Janeiru-Agostu) 2014, Sekretariadu Estado Politika Formasaun Profesional e Empregu simu keixa hamutuk 196 husi trabalhador sira kona ba disputa laboral.
Diretor Nasional Relasaun do Trabalho (DNRT), Angelo dos Santos Veloso, hateten kada loron sira simu keixa husi trabalhador sira kona ba disputa laboral.
“Keixa kona ba salario, kontratu no seluk tan, kuaze ke loron-loron deit ami simu lima ba leten,” Diretor Nasional Relasaun Trabalho, Veloso hateten, iha Kaikoli, Dili.
Tuir dadus husi Janeiru to’o Agostu, nia hateten, registu ona kazu hamutuk 196, husi numeru ne’ebe iha, kazu 103 mak rezolvidu ona entre kompania, trabalhador no SEPFOPE, iha 36 kazu mak kansela.
Razaun kansela, nia dehan, tanba kompania bolu fila fali trabalhador sira atu servisu no iha balun haruka ba arbitrazen atu resolve, tanba SEPFOPE laiha forsa atu resolve ona.
Nia haktuir, DNRT nia kompetensia mak halo mediasaun, maibe labele obriga tantu kompania no trabalhador.
“Kuandu problema komplikadu ruma, tenke haruka ba arbitrazen hodi resolve,” nia hateten.
Husi kazu hirak ne’e, nia hatutan, maioria kazu salariu, kompania selu trabalhadores la tuir salariu estadarte husi governu nian $1, 015, laiha kontratu inklui mos problema seluk.
“Barak liu mak problema salario no kontratu,” nia hateten.
Iha parte seluk, Deputadu Antonio Ximenes Serpa, ejiji ba SEPFOPE atu sosializa lei do trabalho ba kompania sira no trabalhadores, atu sira ida-idak bele hatene sira nia dever no direitu.
Nia hatutan, durante ne’e parlamentu simu keixa barak ona husi trabalhador sira tanba kompania selu sira la tuir estandar ne’ebe governu fo, la fo kontratu no hapara sira arbiru deit.
“Hau simu keixa ida husi trabalhador ida hateten katak nia asina kontratu servisu ho kompania internasional ida to’o 2015 maibe kontratu seidauk remata kompania nain hapara tiha husi servisu ne’e lalos,” nia dehan.
