Membru Parlamentu Nasional lamentavel ho hahalok diretor saude distritu balun ne’ebe abandona sira nia servisu iha fasilidade saude, tanba ba servisu fali servisu sira nia to’os no natar.
Tanba ne’e Deputada Domingas Alves da Silva alias Bilou Mali, husu ba Ministerio Saude tenke kontrola funsionario sira ne’e, nudar ajente tenke mantein iha servisu fatin 24 oras.
“Hau bele, dehan hanesan iha distritu Viqueque, hau ba haree rasik ho matan nia deputi mak ativu, maibe diretor ba fali kuda hudi no halo to’os,” Deputada Bilou Mali lamenta, iha Parlamentu Nasional.
Nia dehan, Ministerio Saude tenke bolu atensaun ba sira, tanba ho sira nia baruk ten ne’e komunidade sira la hetan atendimentu saude ne’ebe diak “falta aimoruk no seluk tan,”.
Nia dehan, iha fiskalizasaun ne’ebe sira halo, nota katak situasaun ida ne’e la’os akontese deit iha Viqueque, maibe distritu balun mos.
Lamentasoens hanesan hato’o mos husi Deputadu Antonio Ximenes Serpa, katak pesoal saude labele abandona pasientes, tanba deit halo sira nia servisu privadu.
“Barak mak ho rajaun ba haree familia, entaun presiza haree mos rezidensia sira nian iha ne’ebe koloka tuir, atu labele fo impaktu ba servisu atendimentu publiku,” nia dehan.
Deputadu ne’e dehan, funsionariu sira iha distritu tama servisu la tuir oras servisu ne’ebe determina ona (tama 08:30 no sai 17:30), sira balun tama tuku 10:00 no sai 12:00 no lokraik ba halo servisu privadu seluk.
Problema abandona servisu la’os deit ajente saude sira, maibe nia dehan, medikus sira mos.
“Pasientes tama sentru saude iha tuku 2:00 lokraik, maibe sentru saude ema laiha,” nia dehan.
“Familia pasiente tenke ba buka iha to’os no natar laran foin hetan, dala ruma pasiente labele salva, tanba atendementu tarde,”.
Hatan ba kestaun ida ne’e, Ministru Saude, Sergio da Costa Lobo, rekonese kestaun ida ne’e, tanba ajente saude balun viajen mai Dili barak liu duke iha fatin ne’ebe sira servisu ba.
“Ne’ebe tinan ida ne’e ami foti desizaun, reuniaun sei la bolu tan sira mai Dili, e ami monta ona sistema audio telekonferensia atu kontrola no fasilita sira hola parte iha enkontru sira iha nasional,” nia dehan.
