Organizasaun Fundasaun Alola (FA) hapara apoia bolsu estudu ba bolseira nain lima ne’ebe durante ne’e hetan, tanba isin rua.
Diretora Ezekutivu Fundasaun Alola, Alzira Reis, hateten programa bolsu estudu ne’e atu ajuda no fo oportunidade ba kbi’it la’ek nia oan feto sira atu asesu ba edukasaun formal.
“Ami hapara ami nia apoiu bolsu estudu ba sira no ami buka fali ema seluk ne’ebe nivel edukasaun hanesan hodi troka fila fali,” Diretora Reis hateten, iha Mascarenhas, Dili.
Nia hateten, labarik feto bele hetan gravid lais, tanba tempu feriadu ne’ebe naruk no kleur liu “sira laiha aktividades, lori malu tun sa’e ho sira nia namoradu, e ikus mai isin rua,”.
Razaun FA fo bolsu estudu ba ema kbi’it la’ek nia oan, nia dehan, tanba dadus hatudu katak feto barak la asesu edukasaun formal tanba ekonomia.
Nia hatutan, sei laiha tan oportunidade ba bolseirus sira ne’e atu hetan bolsu estudu husi Fundasaun Alola, maibe sira nafatin halo advokasia atu governu bele iha politika ida klaru hodi reentrega fila fali estudantes sira ne’e ba eskola hafoin partus.
Alende ne’e nia dehan, FA mos fo formasaun ba bolseiru sira kona ba abilidade moris no saude reprodutiva, nune’e sira bele konese an no hatene deside sira nia future.
Total estudantes sira ne’ebe hetan bolsu estudu husi Fundasaun Alola hamutuk nain 262, balun eskola iha ensino baziku, sekundario no universidade publiku no privadu iha teritorio tomak.
Programa ne’e, nia hateten, hetan apoia finanseira husi Departamentu Negosiu Estranjeiru no Komersiu (DFAT) husi governu Australia (uluk AusAID), ho montante $100 mil.
Entretantu reprezentante feto foinsa’e distritu Bobonaro, Tania Fatima, hateten dalabarak liu feto sira isin rua sedu, tanba falta de informasaun kona ba abilidade moris no saude reprodutiva.
“Sira la hetan informasaun ne’ebe diak, entaun sira monu ba tentasaun sira ne’e,” nia hateten.
Alende ne’e reprezentante feto foinsa’e distritu Viqueque, Melisa Maria Madalena Amaral, katak problema feto isin rua sedu la’os deit iha distritu Bobonaro, maibe kuaze ke distritu hotu inklui distritu Viqueque.
