Membru Parlamentu Nasional husu ba professor sira hotu iha rai laran, atu labele fuma iha klase laran, liu-liu bainhira prosesu aprendizajen la’o hela, tanba ida ne’e bele afeta ba saude estudante sira nian.
Membru Komisaun F (edukasaun, saude, kultura, veteranus no igualdade jeneru), Deputadu Eladio Faculto, hateten maske labele halo kontrolu ba profesores iha rai laran, maibe husu atu kontrolu an bainhira iha klase laran.
“Ne’e ida-idak nia abitua no karakter,” Deputadu Faculto hateten, iha Parlamentu Nasional.
Faculto rekonese katak fuma ne’e iha parte balun diak tanba nebe aumenta ema nia hanoin, liuliu mestri sira atu hanorin, maibe “fora da eskola, la’os iha sala laran,” nia dehan.
Tanba ne’e nia husu ba Ministeriu Edukasaun (ME) atu tau atensaun ba professor sira,liu-liu sira ne’ebe gosta fuma iha klase laran.
Entretantu Profesor Eskola Ensino Baziku Sentral Lospalos, Alberto da Costa, hateten durante ne’e iha sira nia eskola laiha mestri ida mak fuma iha klase laran.
“Hau la hatene iha eskola balun karik, maibe iha hau eskola ne’e laiha,” nia hateten.
Hatan ba kestaun ne’e Ministeriu Edukasaun, Bendito Freitas, katak tuir regras ne’ebe iha professor sira labele fuma durante hanorin hela iha klase laran.
