Atu asegura stok ran iha Unidade Banku Nasional de Sangue (BNS) estabelese grupu komunidade doasaun ran atu apoia pesoal saude sira halo sosializasaun ba komunidade no halao doasaun ran rutina hodi responde ba nesedidade iha fasilidade saude hotu.
Xefe Unidade BSN, Arsenio Jose Alves Guterres Afonso, hateten prezensa grupu ida ne’e importante tebes atu apoia sistema servisu transfusaun ran iha Timor –Leste.
“Bele responde ba iha nesesidade ran ne’ebe kada loron aumenta,” Xefe Afonso hateten, iha Timor Plaza, Dili.
Nia haktuir, grupu ida ne’e inisia husi donor voluntariu individu no familia sira ne’ebe durante ne’e fo ran hodi salva ema seluk nia vida, liu –liu inan feto sira iha fasilidade saude hotu.
Grupu ida ne’e sei iha nia estruktura ho vizaun no misaun, inklui mos planu estratejiku annual hodi kontribui ba sistema servisu transfusaun ran iha Timor –Leste.
“Sira mak sei haforsa sistema servisu transfusaun ran iha Timor –Leste, halo koleksaun ran regular ne’ebe hala’o kada fulan tolu,” Xefe BNS ne’e hateten.
Nia dehan, nafatin halo sosializa ba komunidade sira, liu–liu vantajen husi transfusaun ran tanba komunidade barak sei tauk atu fo ran.
Iha fatin hanesan, Diretor Jeral Ospital Nasional Guido Valadares (HNGV), Jose Antonio Gusmão, rekonese katak durante ne’e stok ran iha BSN sempre falta, maibe koko resolve.
“Tanba koopera ho familia pasientes no donor voluntariu sira,” nia dehan.
Nia mos husu ba komunidade hotu atu hola parte iha grupu ida ne’e, hodi fo ran ho rutina salva ema seluk nia vida, liu-liu inan partus sira.
“Supporta ita nia BNS hodi fasilita ita nia maun alin sira ne’ebe mai ho presiza ran,” Gusmão hateten.
Entretantu donor voluntariu, Yongki kompromete an ho nia familia tomak sai nudar membru komunidade voluntario atu fo ran rutina hodi salva ema seluk ne’ebe presiza.
“Hau fo ran ba dala 104 to’o agora hau isin diak tanba ne’e hau husu ba ema hotu mai ita fo ran turuk ida hodi salva maluk sira seluk nia vida,” Yongki hateten.
Nia hatutan, liu husi fo ran rutina hanesan mos meus ida atu kontrola kondisaun saude tanba liu husi ran ne’ebe fo bele identifika moras ne’ebe iha laran atu bele halo intervensaun sedu.
