Organizasaun Fundasaun Mahein kestiona maka’as kona ba sentensa 72 horas ne’ebe uluk aplika ba motorist sira ne’ebe laiha SIM, maibe agora laiha ona maske kondutor barak mak laiha SIM.
Vise Diretor Fundasaun Mahein (FM), Joao Almeida, hateten lei kodigu penal artigu 207 kriminaliza motorista ne’ebe laiha karta kondusaun, tenke detein sira sira durante 72 horas.
“Uluk iha tinan kotuk, dia 04 Outubru 2013), Polisia Nasional Tranzito (POLTRANS) konsege hatama motorist nain 40 ba prizaun, tanba laiha SIM, maibe agora laiha ona,” Almeida kestiona, iha Balide, Dili.
Nia dehan, uluk POLTRANS sira bainhira halo operasaun mak hetan motorista laiha SIM, maka hatama sira ba prizaun 72 horas.
Tuir nia, ezekuta lei la haree ba tempu no situasaun saida mak akontese, maibe implementasaun lei ne’e tuir nia dalan hodi nune’e obriga sidadaun tenke hakruk.
“Operasaun ne’e kuandu halo ona, tenke halo bebeik,” Vise Diretor FM ne’e sujere.
Hatan ba ida ne’e Komandante POLTRANS, Inspektor Xefe Antonio L.C. Soares, katak operasaun kontinua la’o.
“Foin lalais ami halo fali operasaun no konsege kaer motorista nain sia no hatama ba prizaun to’o prosesu hearing,” Inspektor Xefe Soares hateten.
So ke nia dehan, prosesu operasaun mak dala ruma hala’o fulan ida dala rua deit.
