Membru Parlamentu Nasional kestiona kona ba motorizadas 105 ne’ebe husik abandona iha armajen Ministeriu Agrikultura no Peskas (MAP) nia fatin, enkuantu motor hirak ne’e sosa ho orsamentu tinan kotuk nian.
Deputadu Aurelio Freitas Ribeiro, hateten motor hirak ne’e sosa hodi fo ba iha funsionariu sira iha distritus ,maibe to’o agora seidauk halo distribuisaun ba sira.
“Servisu balun iha baze seidauk masimu, tanba fasilidades laiha e motor sira ne’e sosa pare fahe hodi sira halo servisu, la’os ba bou fali iha armajen,” Deputadu Ribeiro kestiona, iha Parlamentu Nasional.
Nia dehan, preokupasoens kona ba falta transporte ne’e kestiona husi funsionariu MAP nian ba membru Komisaun D (ekonomia e dezemvolvementu) wainhira halo fiskalizasaun iha baze.
“Iha Oe-Cusse Ministru haruka sira halo SIM, maibe to’o SIM ne’e mate mos motor ida la mai,” Deputadu ne’e hateten.
Tanba ne’e, nia husu, ba MAP atu fo razaun klaru tanba saida mak to’o agora motor hirak ne’e seidauk distribui.
Hatan ba kestaun ne’e Ministru Mario Asanami Sabino, katak motor hirak ne’e to’o agora seidauk distribui, tanba iha tempu badak MAP sei monta sentru dezenvolvementu komunidade agrikula iha suku 14 kada distritu ida.
“Sei transfere funsionariu tekniku hamutuk 200 ba distritu, depois mak identifika iha parte ne’ebe mak presiza motor, tanba motor mos limitadu,” Ministru Sabino esplika.
Nia dehan, iha tempu badak programa sira ne’e sei hala’o no motor hirak ne’e bele ona distribui ba funsionariu sira hodi halo’o servisu iha baze.
