Ministerio Administrasaun Estatal hamutuk ho Ajensia USAID Counterpart sei fo kapasitasaun ba lideransa local sira kona ba jestaun finansas no transparansia, tanba sira mak sei sai responsavel ba implementasaun Programa Nasional dezenvolvementu Sukus (PNDS).
Ministru Administrasaun Estatal (MAE), Jorge da Conçeicão Teme, hateten kapasitasaun kona ba jestaun finansas no transparansia importante tebes ba sira, tanba programa PNDS agora implementa dadaun ona.
“Sira mak sai prezidente iha sukus atu kontrola, monitoriza no responsabiliza ba lala’ok PNDS, tanba ne’e mak ami husu Counterpart Amerika atu treina sira, nune’e osan la’os tama ba sira nia an maibe ba povu,” Ministru Teme hateten, bainhira asina akordu ho USAID CounterPart, iha salaun VIP MAE, Dili.
Iha tinan ne’e MAE iha prioridade barak, maibe nia dehan, sei foka uluk ba iha desenstralizasaun administrative no dezenvolvementu local ne’ebe lideransa sukus sira sai hanesan alvu mos ba implementasaun programa sira ne’e hotu.
Ministru mos husu ba organizasaun local no nasional sira, ne’ebe hola parte iha programa kapasitasaun ne’e atu iha prinsipio kapasitasaun ne’ebe seriadade, nune’e Timor oan sira mos iha kapasidade atu ezekuta orsamentu no kontribui ba iha prosesu hotu.
“Se deit mak sai partisipantes, tenke iha mudansa depois de fo treinamentu, ne’e ita nia esperansa,” Ministru Teme esperansa.
Entretantu Koordenadora USAID CountryPart, Carolyn Tanner, hateten antes fo formasaun ba konselho sukus countrypark hamutuk ho parseiru implementador sira hanesan NGO Belun sei halo asesmentu ba sukus no dezenvolve metodu kapasitasaun ne’ebe iha.
Nia hateten, tuir observasaun counterpart nian, katak iha asuntu jeral neen mak lideransa local sira presiza, mak hanesan lidership, transparansia, jestaun finanseiru, koordenasaun no kolaborasaun inkui komunikasaun.
“Formasaun, depende ba nesesidade konselho suku ida- idak, tanba ne’e ami sei halo asesmentu rapidu ba suku sira ne’ebe atu partisipa iha programa ne’e, indentifika sira nia frakeza,” Koordenadora Tanner hateten.
Nia informa, programa kapasitasaun ne’e sei hetan partisipasaun husi konselho sukus hamutuk 100, iha distritu lima hanesan distritu Baucau, Covalima, Oe-Cusse, Ermera no Liquisa.
Programa pilotu ne’e sei la’o durante tinan hat (4) supporta finanseiru husi Ajensia Estadus Unidus ba Dezenvolvementu Internasional (USAID) ho montante $6 miliaun.
