Laboratorium testu ran nian iha Klinika Polisia Nasional Timor-Leste dadaun ne’e ladun funsiona ho diak, tanba sei falta rekursu humanu.
Xefe Klinika Polisia Nasional Timor-Leste (PNTL), Inspektor Abilio de Araujo, hateten laboratorium ne’e kompletu ona ho ekipamentus, so ke doutor ne’ebe toma konta ba parte ida ne’e mak laiha, tanba sei eskola hela iha Kediri, Indonezia.
“Tinan ida ne’e nia remata ona nia estudu, no bainhira nia fila mai, bele funsiona hikas loboratorium ne’e,” Xefe Klinika PNTL ne’e hateten, iha Kaikoli, Dili.
Durante ne’e, nia dehan, wainhira membru ida atu halo testu ba ran, klinika sei delega sira ba Ospital Nasional Guido Valadares (HNGV).
“Rezultadu teste ne’e sira fo mai ami, depois mak fo reseita aimoruk,” nia hateten.
Iha lidun seluk Deputadu Inacio Moreira, hateten rekursu humanu ne’e importante no governu tenke tau atensaun ba kestaun ne’e.
“Sira iha laboratorium, maibe laiha rekursu humanu, ne’e mak problema,” Deputadu husi bankada Fretilin ne’e dehan.
Maibe nia dehan, pasu diak ida tanba sira komesa haruka ema nain ida ba eskola, atu nune’e wainhira fila mai ona laboratorium ne’e bele funsiona.
“Ita hein katak sira bele prepara planu ne’e ho didiak, prepara ema hodi servisu iha laboratorium ne’ebe loke ona iha institusaun refere,” nia esperansa.
